Hamd
Mubarak ho wo shah parde se bahar aane wala hai
مبارک ہو وہ شہ پردے سے باہر آنے والا ہے
Urdu Kalam
مطلع
مبارک ہو وہ شہ پردے سے باہر آنے والا ہے
گدائی کو زمانہ جس کے دَر پر آنے والا ہے
چکوروں سے کہو ماہِ دِل آرا ہے چمکنے کو
خبر ذَرَّوں کو دو مہر منور آنے والا ہے
فقیروں سے کہو حاضر ہوں جو مانگیں گے پائیں گے
کہ سلطانِ جہاں محتاج پروَر آنے والا ہے
کہو پروانوں سے شمع ہدایت اب چمکتی ہے
خبر دو بلبلوں کو وہ گل تر آنے والا ہے
کہاں ہیں ٹوٹی امیدیں کہاں ہیں بے سہارے دل
کہ وہ فریاد رس بیکس کا یاوَر آنے والا ہے
ٹھکانا بے ٹھکانوں کا سہارا بے سہاروں کا
غریبوں کی مدد بیکس کا یاور آنے والا ہے
بر آئیں گی مرادیں حسرتیں ہوجائیں گی پوری
کہ وہ مختارِ کل عالم کا سروَر آنے والا ہے
مبارک دَرد مندوں کو ہو مژدہ بیقراروں کو
قرارِ دِل شکیبِ جانِ مضطر آنے والا ہے
گنہگارو نہ ہو مایوس تم اپنی رِہائی سے
مدد کو وہ شفیعِ روزِ محشر آنے والا ہے
جھکا لائے نہ کیوں تاروں کو شوقِ جلوۂ عارِض
کہ وہ ماہ ِدل آرا اَب زمیں پر آنے والا ہے
کہاں ہیں بادشاہانِ جہاں آئیں سلامی کو
کہ اب فرماں روائے ہفت کشور آنے والا ہے
سلاطینِ زمانہ جس کے دَر پر بھیک مانگیں گے
فقیروں کو مبارک وہ تونگر آنے والا ہے
یہ ساماں ہو رہے تھے مدتوں سے جس کی آمد کے
وہی نوشاہ باصد شوکت و فر آنے والا ہے
وہ آتا ہے کہ ہے جس کا فدائی عالمِ بالا
وہ آتا ہے کہ ِدل عالم کا جس پر آنے والا ہے
نہ کیوں ذَرَّوں کو ہو فرحت کہ چمکا اَختر قسمت
سحر ہوتی ہے خورشید منور آنے والا ہے
مقطع
حسنؔ کہہ دے اُٹھیں سب امتی تعظیم کی خاطر
کہ اپنا پیشوا اپنا پیمبر آنے والا ہے
Kalam Details
Bahr
Bahr-e-Hazaj
Radif
ے
Total Ashaar
16
Total Misra
32
Writer
Maulana Hasan Raza Khan
Book
Zauq-e-Naat