Hamd
Qibla ka bhi kaaba rukh-e-neku nazar aaya
قبلہ کا بھی کعبہ رُخِ نیکو نظر آیا
Urdu Kalam
مطلع
قبلہ کا بھی کعبہ رُخِ نیکو نظر آیا
کعبہ کا بھی قبلہ خمِ اَبرو نظر آیا
محشر میں کسی نے بھی مری بات نہ پوچھی
حامی نظر آیا تو بس اِک تو نظر آیا
پھر بند کشاکش میں گرفتار نہ دیکھے
جب معجزۂ جنبش اَبرو نظر آیا
اس دل کے فدا جو ہے تری دید کا طالب
اُن آنکھوں کے قربان جنہیں تو نظر آیا
سلطان و گدا ہیں سب تِرے دَر کے بھکاری
ہر ہاتھ میں دروازہ کا بازو نظر آیا
سجدہ کو جھکا جائے براہیم میں کعبہ
جب قبلۂ کونین کا اَبرو نظر آیا
بازارِ قیامت میں جنہیں کوئی نہ پوچھے
ایسوں کا خریدار ہمیں تو نظر آیا
محشر میں گنہگار کا پلہ ہوا بھاری
پلہ پہ جو وہ قربِ ترازو نظر آیا
یا دیکھنے والا تھا ترا یا ترا جویا
جو ہم کو خدا بین و خدا جو نظر آیا
شل ہاتھ سلاطیں کے اُٹھے بہر گدائی
دروازہ ترا قوتِ بازو نظر آیا
یوسف سے حسیں اور تمنائے نظارہ
عالم میں نہ تم سا کوئی خوش رُو نظر آیا
فریادِ غریباں سے ہے محشر میں وہ بے چین
کوثر پہ تھا یا قربِ ترازو نظر آیا
تکلیف اُٹھا کر بھی دعا مانگی عدو کی
خوش خلق نہ ایسا کوئی خوش خو نظر آیا
مقطع
ظاہر ہیں حسنؔ احمد مختار کے معنٰے
کونین پہ سرکار کا قابو نظر آیا
Kalam Details
Bahr
Bahr-e-Ramal Musamman Mahzuf
Radif
ا
Total Ashaar
14
Total Misra
28
Writer
Maulana Hasan Raza Khan
Book
Zauq-e-Naat