Hamd
Aye zaair-e-koo-e-nabi itna tu kar aye meherbaan
اے زائر کوئے نبی اتنا تو کر اے مہرباں
Sadr-ul-Afazil Maulana Syed Muhammad Naeemuddin Muradabadi
Urdu Kalam
مطلع
اے زائرِ ُکوئے نبی اِتنا تو کر اے مہرباں
اہلِ مَدینہ کو سُنا حالِ نعیمِ خستہ جاں
مایوسیوں کی کثرتیں ناکامیوں پر حسرتیں
تنہائیوں کی وحشتیں اَندوہِ غم کی داستاں
بے تابیوں کا سلسلہ بے چینیوں کا مشغلہ
ناصبریوں کا غلغلہ اور شدتِ دردِ نہاں
سر میں ہے سودائے جنوں وحشت سے حالت ہے زَبوں
دل سے ہوا رخصت سکوں آنکھوں سے اشکِ خوں رَواں
شدت پہ ہے دورانِ سر زوروں پہ ہے دردِ جگر
خوں رو رہی ہے چشمِ تر پھٹ کر ہوا ہے دِل کتاں
جاتے رہے تاب و تواں اَعضا میں قوت ہے کہاں
غم نے کیا ہے نیم جاں دَردِ جدائی الاماں
یہ شورشِ طوفانِ غم یہ سوزشِ رنج و اَلم
ہجراں کے یہ جورو ستم اور یہ ضعیف و ناتواں
دن حسرتوں میں کاٹنا راتوں کو رونا جاگنا
ہر وقت غم کا سامنا ہر لحظہ آنکھیں خونفشاں
اَعدا کے نرغے ہیں جُدا اپنے ہوئے ہیں بے وفا
ہر سمت سے آئی بلا آفت کا ٹوٹا آسماں
جور و ستم کی بارشیں اور دشمنوں کی سازشیں
بیکار ہیں سب نالشیں مسلم کا خوں ہے رائیگاں
ہم کیا کہیں حالِ تباہ ہم سے ہوئے بے حد گنہ
بے شک ہیں ہم نامہ سیاہ نادِم ہیں اب ہم بے گماں
رَبِّیْ ظَلَمْنَا نَفْسَنَا تُبْنَا اِلَیْکَ رَبَّنَا
فَاغْفِرْلَنَا مَا قَدْ مَضٰی بخش اے رحیمِ بیکساں
یَا اَھْلَ طَیْبَۃ اُنْظُرُوْا اَحْوَالَنَا ثُمَّ اذْھَبُوْا
عِنْدَالشَّفِیْعِ وَاشْفَعُوْا فِیْ حَضْرَتِہٖ بِالْجِنَاں
قُوْلُوْا لَہٗ خَیْرَ الْوَرٰی اِرْحَمْ عَلٰی مَنْ قَدْ عَصٰی
جَآئَ اِلَیْکَ تَائِبًا کن درگزر اَ ز جرمِ آں
اے خاتمِ پیغمبراں اے سرورِ ہر دو جہاں
اے مالکِ کون و مکاں رحمے بحالِ عاصیاں
اے رحمتِ عالم مدد اے سید اَکرم مدد
اے دافعِ ہر غم مدد اِمداد اے شاہِ جہاں
فریاد اے سلطانِ دیں اے رحمۃ للعالمیں
تم ہو شفیع المُذنبیں اس دَر سے ہم جائیں کہاں
فریاد اے محبوبِ رب فریاد اے شاہِ عرب
ہم تم سے کرتے ہیں طلب دل کی مرادیں ہر زماں
دل کی مرادیں دیجئے مسرور ہم کو کیجئے
اب تو خبر لے لیجئے غم ہوچکے ہیں بے کراں
ہم کو خلاصی ہو عطا ہو دُور سب رنج و بلا
آفت کی گھٹ جائے گھٹا چمکیں نہ غم کی بجلیاں
اب کیجئے ایسا کرم ہو دین کا اونچا علم
کفار کی گردن ہو خم ان کا مٹے نام و نشاں
اسلام کی لیجے خبر اور کفر کو پہنچے ضرر
کفار ہوں زیر و زَبر سب بھول جائیں مستیاں
مسلم کو پھر شوکت ملے اِسلام کو قوت ملے
بدخواہ کو ذلت ملے اے دین حق کے پاسباں
ذوقِ عبادت ہم کو دو شوقِ ریاضت ہم کو دو
سنت کی رغبت ہم کو دو ہم سے ادا ہوں نیکیاں
مسلم ہوں باہم متحد بھائی کا بھائی ہو ممد
مٹ جائے سب آپس کی ضد رشک و حسد سے ہو اماں
طیبہ میں اپنے لطف سے اِذنِ اِقامت دیجئے
فرقت سے دل بے تاب ہے کب تک ر ہوں ہندوستاں
راہِ مَدینہ دور ہے بندہ بہت رنجور ہے
اور حاضری منظور ہے امداد سلطانِ جہاں
یَا رَبَّنَا صَلِّ عَلٰی مَحْبُوْبِکَ مَحْبُوْبِنَا
اَزْکٰی صَلٰوۃٍ دَآئِمًا اَنْمٰی صَلٰوۃٍ کُلِّ آں
مقطع
یَا رَبَّنَا سَلِّمْ عَلٰی رُوْحِ النَّبِیِّ الْمُصْطَفٰی
وَالْاٰلِ وَالصَّحْبِ اِلٰی مَا دَارَ دَوْرَانُ الزَّمَاں
Kalam Details
Bahr
Bahr-e-Muzare Musamman Akhram Makfuf Mahzuf
Radif
ں
Total Ashaar
29
Total Misra
58
Writer
Sadr-ul-Afazil Maulana Syed Muhammad Naeemuddin Muradabadi
Book
Riyaz-e-Naeem