Munajat
Ajab rang par hai bahaar-e-Madina
عجب رنگ پر ہے بہارِ مدینہ
Urdu Kalam
مطلع
عجب رنگ پر ہے بہارِ مدینہ
کہ سب جنتیں ہیں نثارِ مدینہ
مبارک رہے عندلیبو تمہیں گل
ہمیں گل سے بہتر ہیں خارِ مدینہ
بنا شہ نشیں خسروِ دو جہاں کا
بیاں کیا ہو عز و وَقارِ مدینہ
مری خاک یارب نہ برباد جائے
پسِ مرگ کردے غبارِ مدینہ
کبھی تو معاصی کے خرمن میں یا رب
لگے آتشِ لالہ زارِ مدینہ
رگِ گل کی جب نازُکی دیکھتا ہوں
مجھے یاد آتے ہیں خارِ مدینہ
مَلائک لگاتے ہیں آنکھوں میں اپنی
شب و روز خاکِ مزارِ مدینہ
جدھر دیکھیے باغِ جنت کھلا ہے
نظر میں ہیں نقش و نگارِ مدینہ
رہیں اُن کے جلوے بسیں اُن کے جلوے
مرا دل بنے یادگارِ مدینہ
حرم ہے اسے ساحت ہر دو عالم
جو دل ہو چکا ہے شکارِ مدینہ
دو عالم میں بٹتا ہے صدقہ یہاں کا
ہمیں اِک نہیں ریزہ خوارِ مدینہ
بنا آسماں منزلِ ابن مریم
گئے لامکاں تاجدارِ مدینہ
مرادِ دلِ بلبلِ بے نوا دے
خدایا دِکھا دے بہارِ مدینہ
مقطع
شرف جن سے حاصل ہوا انبیا کو
وہی ہیں حسنؔ اِفتخارِ مدینہ
Kalam Details
Bahr
Bahr-e-Mutaqarib Musamman Salim
Radif
ہ
Total Ashaar
14
Total Misra
28
Writer
Maulana Hasan Raza Khan
Book
Zauq-e-Naat