Hamd
Wasf kya likkhey koi is mahbit-e-anwaar ka
وصف کیا لکھے کوئی اس مہبط اَنوار کا
Urdu Kalam
مطلع
وصف کیا لکھے کوئی اس مَہْبِطِ اَنوار کا
مہر و مہ میں جلوہ ہے جس چاند سے رُخسار کا
عرشِ اَعظم پر پھریرا ہے شہِ اَبرار کا
بجتا ہے کونین میں ڈَنکا مرے سرکار کا
دوجہاں میں بٹتا ہے باڑہ اسی سرکار کا
دونوں عالم پاتے ہیں صدقہ اسی دَربار کا
جاری ہے آٹھوں پہر لنگر سخی دَربار کا
فیض پر ہر دَم ہے دَریا اَحمدِ مختار کا
روضۂ والائے طیبہ مخزنِ اَنوار ہے
کیا کہوں عالم میں تجھ سے جلوہ گاہِ یار کا
دل ہے کس کا جان کس کی سب کے مالک ہیں وہی
دونوں عالم پر ہے قبضہ اَحمدِ مختار کا
کیا کرے سونے کا کشتہ کشتہ تیرِ عشق کا
دِید کا پیاسا کرے کیا شربتِ دِینار کا
فق ہو چہرہ مہر و مہ کا ایسے منہ کے سامنے
جس کو قسمت سے ملے بوسہ تری پیزار کا
لات ماری تم نے دُنیا پر اگر تم چاہتے
سلسلہ سونے کا ہوتا سلسلہ کُہسار کا
میں تیری رحمت کے قرباں اے مرے اَمن واَ ماں
کوئی بھی پُرساں نہیں ہے مجھ سے بدکردار کا
ہیں مَعاصی حد سے باہر پھر بھی زاہد غم نہیں
رحمتِ عالم کی اُمت بندہ ہوں غفار کا
تو ہے رحمت بابِ رحمت تیرا دَروازہ ہوا
سایۂ فضلِ خدا سایہ تیری دِیوار کا
مقطع
کعبہ و اَقصیٰ و عرش و خلد ہیں نوریؔ مگر
ہے نرالا سب سے عالم جلوہ گاہِ یار کا
Kalam Details
Bahr
Bahr-e-Ramal
Radif
ا
Total Ashaar
13
Total Misra
26
Writer
Al-Madinat-ul-Ilmiyah
Book
Saman-e-Bakhshish
Topics
Ishq-e-Rasool
Madina