Hamd
Khaak-e-taiba ki agar dil mein ho waqat mehfooz
خاک طیبہ کی اگر دل میں ہو وقعت محفوظ
Urdu Kalam
مطلع
خاکِ طیبہ کی اگر دل میں ہو وَقعت محفوظ
عیب کوری سے رہے چشمِ بصیرت محفوظ
دل میں روشن ہو اگر شمع وِلائے مولیٰ
دُزدِ شیطاں سے رہے دِین کی دولت محفوظ
یا خدا محو نظارہ ہوں یہاں تک آنکھیں
شکل قرآں ہو مِرے دل میں وہ صورت محفوظ
سلسلہ زلف مبارک سے ہے جس کے دل کو
ہر بلا سے رکھے اللہ کی رحمت محفوظ
تھی جو اُس ذات سے تکمیل فرامیں منظور
رکھی خاتم کے لئے مہرِ نبوت محفوظ
اے نگہبان مِرے تجھ پہ صلاۃ اور سلام
دو جہاں میں تِرے بندے ہیں سلامت محفوظ
واسطہ حفظِ الٰہی کا بچا رہزن سے
رہے ایمانِ غریباں دمِ رحلت محفوظ
شاہیٔ کون و مکاں آپ کو دی خالق نے
کنز قدرت میں اَزَل سے تھی یہ دولت محفوظ
تیرے قانون میں گنجائش تبدیل نہیں
نسنح و ترمیم سے ہے تری شریعت محفوظ
جسے آزاد کرے قامتِ شہ کا صدقہ
رہے فتنوں سے وہ تا روزِ قیامت محفوظ
مقطع
اس کو اَعدا کی عداوَت سے ضرر کیا پہنچے
جس کے دِل میں ہو حسنؔ اُن کی محبت محفوظ
Kalam Details
Bahr
Bahr-e-Ramal Musamman Mahzoof
Radif
ظ
Total Ashaar
11
Total Misra
22
Writer
Maulana Hasan Raza Khan
Book
Zauq-e-Naat