Agar Kaaba Ka Rukh Bhi Janib-e-Maikhana Ho Jaye

Wohi Dil Hai Jo Husn-o-Ishq Ka Kashana Ho Jaye
Woh Sar Hai Jo Kisi Ki Tegh Ka Nazrana Ho Jaye

Yeh Achhi Pardadari Hai Yeh Achhi Razdari Hai
Ke Jo Aaye Tumhari Bazm Mein Deewana Ho Jaye

Mera Sar Kat Ke Maqtal Mein Gire Qatil Ke Qadmon Par
Dam-e-Aakhir Ada Yun Sajda-e-Shukrana Ho Jaye

Teri Sarkar Mein Laya Hun Daali Hasrat-e-Dil Ki
Ajab Kya Hai Mera Manzoor Yeh Nazrana Ho Jaye

Shab-e-Furqat Ka Jab Kuch Tool Kam Hona Nahin Mumkin
To Meri Zindagi Ka Mukhtasar Afsana Ho Jaye

Woh Sajde Jin Se Barson Hum Ne Kaaba Ko Sajaya Hai
Jo Butkhane Ko Mil Jayein To Phir Butkhana Ho Jaye

Kisi Ki Zulf Bikhre Aur Bikhar Kar Dosh Par Aaye
Dil-e-Sad Chaak Uljhe Aur Uljh Kar Shana Ho Jaye

Yahan Hona Na Hona Hai Na Hona Ain Hona Hai
Jise Hona Ho Kuch Khaak-e-Dar-e-Janana Ho Jaye

Sahar Tak Sab Ka Hai Anjam Jal Kar Khaak Ho Jana
Bane Mehfil Mein Koi Shama Ya Parwana Ho Jaye