Aariz-e-Shams-o-Qamar Se Bhi Hain Anwar Eriyaan

Jaa Bajaa Partau Figan Hain Aasmaan Par Eriyaan
Din Ko Hain Khursheed Shab Ko Maah-o-Akhtar Eriyaan

Najm-e-Gardoon To Nazar Aate Hain Chhote Aur Woh Paaon
Arsh Par Phir Kyun Na Hon Mehsoos Laghar Eriyaan

Dab Ke Zair-e-Paa Na Gunjaaish Samaane Ko Rahi
Ban Gaya Jalwa Kaf-e-Paa Ka Ubhar Kar Eriyaan

Un Ka Mangta Paaon Se Thukra De Woh Duniya Ka Taaj
Jis Ki Khaatir Mar Gaye Mun'im Ragad Kar Eriyaan

Do Qamar, Do Panja-e-Khur, Do Sitaare, Das Hilaal
Un Ke Talwe, Panje, Naakhun, Paa-e-Athar Eriyaan

Haaye Us Patthar Se Us Seene Ki Qismat Phooriye
Be Takalluf Jis Ke Dil Mein Yoon Karen Ghar Eriyaan

Taaj-e-Rooh-ul-Quds Ke Moti Jise Sajdah Karen
Rakhti Hain Wallah Woh Paakeezah Gohar Eriyaan

Ek Thokar Mein Uhud Ka Zalzalah Jaata Raha
Rakhti Hain Kitna Waqaar Allahu Akbar Eriyaan

Charkh Par Chadhte Hi Chaandi Mein Siyaahi Aa Gayi
Kar Chuki Hain Badr Ko Taksaal Baahir Eriyaan