Assalam aye khusrawe duniya wa dee’n

Assalam aye badshah e do jaha'n
Assalam aye sarwar e kaun o maka'n

Assalam ay noor e imaa'n asslam
Assalam ay raahat e jaa'n asslam

Ay shakeeb e jaan e muztar Assalam
Aaftab e zarra parwar assalam

Dard o gham ke charah farma assalam
Dard mandon ke maseeha assalam

Ay muraden dene wale assalam
Dono aalam ke ujale assalam

Dard o gham main mubtala hain ye ghareeb
Dam chala teri duhayi ay tabeeb

Nabze'n saqit rooh muztar jee nidhaal
Dard e isya'n se hua hai ghair haal

Be saharo'n ke sahare hai'n huzoor
Haami o yaawar hamare hain Huzoor

Ham ghareebo'n par karam farmaiye
Bad naseebo'n par karam farmaiye

Be qararo'n ke sirhane aaiye
Dil figaro'n ke sirhane aaiye

Jaa'n ba lab ki charah farmayi karo
Jaan e isa ho masehayi karo

Sham hai nazdeek manzil door hai
Paao'n kaise jaan tak ranjoor hai

Maghribi goshon main phooti hai shafaq
Zardi e khursheed se hai rang faq

Raah na maloom sahra pur khatar
Koyi sathi hai na koyi raah bar

Taairon ne bhi basera le liya
Khwahish e parwaaz ko rukhsat kiya

Har taraf karta hun hairat se nigah
Par nahin milti kisi surat se raah

Sau balayen chashm e tar ke samne
Paas ki surat nazar ke samne

Dil paresha'n baat ghabrayi hoyi
Shakl par afsurdagi chayi hoyi

Zulmaten shab ki ghazab dhane lagin
Kali kali badliyan chane lagin

In balaon main phansa hai khana zaad
Aafaton main mubtala hai khana zaad

Ay arab ke chand ay mahr e ajam
Ay khuda ke noor ay shamm e haram

Farsh ki zeenat hai dam se aap ke
Arsh ki izzat qadam se aap ke

Aap se hai jalwa e haq ka zahoor
Aap hi hain noor ki aankhon ke noor

Aap se raushan hoye kaun o maka'n
Aap se purnoor hai bazm e jaha'n

Ay khuda wand e arab shah e ajam
Kijiye hindi ghulamon par karam

Ham siyah karon pe rahmat kijiye
Terah bakhton ki Shafa'at kijiye

Apne Bandon ki madad farmaiye
Pyare Hami muskurate aaiye

Ho agar shan e tabassum ka karam
Subh ho jaye shab e deejor e gham

Zulmaton main gum hua hai raasta
Almadad ay khanda e danda'n numa

Haan dikhana jana tajalli ki adaa
Thokare'n khata hai pardesi tera

Dekhiye kab tak chamakte hain naseeb
Der se hai lau lagaye ye ghareeb

Multaji hun main arab ke chand se
Apne rab se apne rab ke chand se

Main bhikari hun tumhara tum ghani
Laaj rakh lo mere phaile hath ki

Tang aaya hun dil e nakaam se
Is nikamme ko laga do kaam se

Aap Ka darbar hai arsh ishtebah
Aap Ki sarkar hai bekas panah

Maangte phirte hain sultan o ameer
Raat din pheri lagate hain faqeer

Gham zadon ko aap kar dete hain shad
Sab ko mil jati hai muh mangi muraad

Main tumhara hun gada e benawa
Kijie apne be nawaon par ataa

Main ghulam e heech Kara hun Huzoor
Heech karon par karam ho zaroor

Ache achon ke gahak har kahi'n
Ham bado'n ki hai kharedari yahin

Kijie rahmat hasan par kijie
Donon aalam ki muraden dijie