Nazam bawaqt zikr o wiladat syyed Rusul ﷺ

Hai malayik ka yahan par azdham
Dast Basta kyun nahin parhte Salam

Ba Adab hai ba naseeb ay ahl e Dee'n
Be Adab se bad naseebi hai qaree'n

Muzda layi hai Saba kis phool ka
Jis ne aalam ko muattar kar diya

Aaj Kaba kis liye hai shadma'n
Band hai Aatish kadon ka kyun dhuwan

Butkadon main kis liye
Kohram hai

Kufr ka kyun tukre tukre daam hai
Do Jaha'n main kis ka lutf aam hai

Bat raha Islam ka inaam hai
Saf basaf hai kyun firishte ba Adab

Shor kaisa hai ajam se ta Arab
Jannate arasta hai kis liye

Shad sab shah o gada hain kis liye
Konsa mah e Munawwar aaye ga

Chandna phaila hai jis ke Noor ka
Zalzala kyun qasar e kasra main para

Kis ki Aamad ka hai aisa dabdaba
Kyun kahanat par tabahi aa gayi

Kon se sulta'n ki hai jalwah gari
Jab tahayur ahl e hairat ko barha

Hatif e ghaibi ne Yun muzda Diya
Aamad e Aamad sarwar e aalam ki hai

Aamad aamad rahmat e aazam ki hai
Aane Wala Malik e Darren hai

Jis ke bayis khalqat e kounain hai
Ho raha hai aaj kabe ka singhar

Aur shayateen rorahe hai zaar zaar
Koi kehta hai ki aayenge yahan

Wo nabi ul Anbia ba azusha'n
Jin ki Aamad ki khabar Esa ne di

Zikr farmate rahe jin ka Nabi
Nayib e haq badshah e do jaha'n

Jaan e Emaan o makeen e lamaka'n
Hai Nabi ul Anbia

Un ka laqab
Khatam e paighambara'n fakhr e Arab

Shafa e mehshar unhin ka naam hai
Deen o duniya main unhin se kaam hai

Dar par un ke mangte hain taajdar
dono aalam ke yehi hain shahryar

Zarrah zarrah ka hai un ko ikhtiyar
Bantte hain naimaten lail o nihar

Sunte hain yehi gharebon ki pukar
Sare aalam ke yehi hain gham ghusar

Kerte hain faryad un se janwar
Be kason ki ye hi lete hain khabar

Sar par un ke dono aalam ka hai taaj
Un ko dete hain Shahan e dahar baj

Mazhar e ilme khuda ummi laqab
Mukhbir e Sadiq e shahinshah e Arab

Un ki izzat Kon Jane juz khuda
Khud wo farmata hain loluaka lama

Sang un ke paye aqdas dekh kar
Khenchte hain un ka naqsha qalb par

Kyun na ho! Hai arsh ki izzat qadam
Kyun na ho! Hai Farsh ki zeenat qadam

Khak pa akseer ka bharti hai Dam
Khata hai Quran bhi jis ki qasam

Jholiyan dale faqeron be nawa
Hath phailaye hoye shah o gada

Gir rahe hain arz ba zoq turb
Ay mere mehr e ajam mah e Arab

Gah dard Dil saz gah dardeed ja
Her do Jaye tast ya badr ud duja

Ro siyah o be kas o khati Manam
Chashm e rahmat berkasha aasi manam

Man neen munkir khata war tu am
Banda ruswa o nakar tu am

Karwa'n riffat o pareshanam base
Raham kun ya shah barman be kase

Dastger masiyah Kara'n tuyi
Ay shifa e dard bemara'n tuyi

Lo wo utha abr e rahmat jhomta
Rahmat e aalam ki choukhat chomta

Qahet Sali khak main mil jaye gi
Dil ki aalam ke Kali khil jaye gi

Hai sawari aane wali anqareeb
Aane wale hain yahan rabb ke Habeb

Shah e shaha'n aane wale hain yahan
Yun sajaye jate hain Koun o maka'n

Sab Malak hain istadah ba adab
Jalwah farmayen ge ab mahboob e rabb

Sunyo tum bhi bahut tazeem se
jholiyan phaila ke ho jao khare

aur kaho a shah e shaha'n as salam
mere Aaqa jaan e jana'n as salam

Ay shafi e Roz e mahshar as salam
Saqi e Tasneem o kouser as salam

Ahmad o Mahmood nami as salam
Riffat Dee'n taaj wale as salam

Ay mere mairaaj wale as salam
Riffat Dee'n taaj wale as salam

Arsh ki aankhon ke tare as salam
Dono aalam ke sahare sa Salam

Ummati farmane wale as Salam
Paish rab bakhshane wale as Salam

Lambe lambe hathon wale as Salam
Pyari pyari zulfon wale as Salam

Mere wali mere moula as salam
Mere Waris mere aaqa as Salam

Sarwar e aalam Mohammed ﷺ ze waqar
Hon duroode tum pe nazil beshumar

Ay khuda Kar mujh ko abd e Mustafa ﷺ
Tab yaqen janon Daman Ghous e Anam

Qadri may se mujhe sarshar kar
Mast be khud khabar hoshiyar kar

Hain mashayikh silsila main jis qadar
Mai na bholun yaad un ki Umar bhar

Dayima barkaat ke barkaat se
Mujh ko hissa har jagah milta rahe

Mujh pe ache ki rahe achi nazar
Noor Irfa'n se ho Dil rashak e qamar

Mere murshid Hazrat Ahmad Raza
Kar de mujh ko zaat main un ki fana

Un ke faiz o lutf se masroor rakh
Qadri razwi mujhe mashoor rakh

Dost un ka hashar tk phole phale
Dushmanon par qahar ki bijli gire

Un ki sab Aulad aur khuddam ka
Ya khuda kar dono aalam main bhala

Izzat o aish o uloom o fazal de
Hashar Tak ye silsila jari rahe

Ho Jameel qadri ki har Dua
Ya khuda maqbool bahr e Mustafa ﷺ