Talab Ka Munh To Kis Qaabil Hai Ya Ghaus

Duhai Ya Muhiyyud-Deen Duhai
Bala Islam Par Nazil Hai Ya Ghaus

Woh Sangeen Bid'atein Woh Teezi-e-Kufr
Ke Sar Par Tegh Dil Par Sil Hai Ya Ghaus

'Azuman Qaatilan 'Indal-Qitaal
Madad Ko Aa Dam-e-Bismil Hai Ya Ghaus

Khuda Ra Nakhuda Aa De Sahara
Hawa Bigri Bhanwar Haail Hai Ya Ghaus

Jila De Deen Jala De Kufr-o-Ilhaad
Ke Tu Muhiyyi Hai Tu Qaatil Hai Ya Ghaus

Tera Waqt Aur Pare Yoon Deen Par Waqt
Na Tu Aajiz Na Tu Ghaafil Hai Ya Ghaus

Rahi Haan Shaamat-e-A'maal Yeh Bhi
Jo Tu Chaahe Abhi Zaa'il Hai Ya Ghaus

Ghayoora! Apni Ghairat Ka Tasadduq
Wohi Kar Jo Tere Qaabil Hai Ya Ghaus

Khuda Ra Marham-e-Khaak-e-Qadam De
Jigar Zakhmi Hai Dil Ghaayil Hai Ya Ghaus

Na Dekhoon Shakl-e-Mushkil Tere Aage
Koi Mushkil Si Yeh Mushkil Hai Ya Ghaus

Woh Ghera Rishta-e-Shirk-e-Khafi Ne
Phansa Zunnar Mein Yeh Dil Hai Ya Ghaus

Kiye Tarsa-o-Gabr Aqtaab-o-Abdaal
Yeh Mahz Islam Ka Saa'il Hai Ya Ghaus

Tu Quwwat De Main Tanha Kaam Bisyar
Badan Kamzor Dil Kaahil Hai Ya Ghaus

Aduww Bad Deen Mazhab Waale Haasid
Tu Hi Tanha Ka Zor-e-Dil Hai Ya Ghaus

Hasad Se Un Ke Seene Paak Kar De
Ke Badtar Diq Se Bhi Yeh Sil Hai Ya Ghaus

Ghiza-e-Diq Yahi Khoon Ustukhwaan Gosht
Yeh Aatish Deen Ki Aakil Hai Ya Ghaus

Diya Mujh Ko Unhein Mahroom Chhora
Mera Kya Jurm Haq Faasil Hai Ya Ghaus

Khuda Se Lein Larai Woh Hai Mu'ti
Nabi Qaasim Hai Tu Moosil Hai Ya Ghaus

Ataayein Muqtadir Ghaffar Ki Hain
Abas Bandon Ke Dil Mein Ghill Hai Ya Ghaus

Tere Baba Ka Phir Tera Karam Hai
Yeh Munh Warna Kisi Qaabil Hai Ya Ghaus

Bharnay Waale Tera Jhaala To Jhaala
Tera Chheenta Mera Ghaasil Hai Ya Ghaus

Sana Maqsood Hai Arz-e-Gharaz Kya
Gharaz Ka Aap To Kaafil Hai Ya Ghaus