Payaam laai hai baad-e-saba Madine se

Ilahi koi to mil jaaye chara-gar aisa
Hamare dard ki la de dawa Madine se

Hisab kya ke Nakirein ho gaye be-khud
Jab aai qabr mein thandi hawa Madine se

Yahi to khana-kharabi ka ek thikana hai
Chale kahan dil-e-dard-ashna Madine se

Janab-e-Khizr ko zulmat ne diye dhoke
Mila to saghar-e-aab-e-baqa Madine se

Hamare samne yeh nazish-e-bahar fuzool
Bahisht le ke gayi hai faza Madine se

Na aayen ja ke wahan se yahi tamanna hai
Madine la ke na laaye Khuda Madine se

Farishte saikron aate hain aur jaate hain
Bahut qareeb hai Arsh-e-Khuda Madine se

Usi ka faiz hai duniya mein yeh woh chokhat hai
Jo kuch kisi ko mila woh mila Madine se