Jab talak yeh chaand taare jhilmilaate jaayenge

Un ke aashiq noor ki shamaein jalaate jaayenge
Jabke haasid dil jalaate satpataate jaayenge

Naat-e-Mehboob-e-Khuda sunte sunaate jaayenge
Ya Rasool Allah ka na'ra lagaate jaayenge

Hashr tak Jashn-e-Wiladat hum manaate jaayenge
Marhaba ki dhoom yaaro! Hum machaate jaayenge

Chaar jaanib hum diye ghee ke jalaate jaayenge
Ghar to ghar saare, mahalle ko sajaate jaayenge

Hum Mah-e-Milaad mein lehraayenge jhande hare
Saari galiyaan roshni se jagmagaate jaayenge

Eid-e-Milaad-un-Nabi ki shab charaghaan karke hum
Qabr-e-Noor-e-Mustafa se jagmagaate jaayenge

Hum Juloos-e-Jashn-e-Milaad-un-Nabi mein jhoom kar
Raaste bhar naat bas sunte sunaate jaayenge

Laakh shaitaan hum ko roke fazl-e-Rab se taa abad
Jashn, Aaqa ki Wiladat ka manaate jaayenge

Jhoom kar saare kaho, Aaqa ki aamad Marhaba
Hashr mein bhi hum yahi na'ra lagaate jaayenge

Ya Rasool Allah ka na'ra lagao zor se
Un ke dushman munh phulaate burburaate jaayenge

Tum karo Jashn-e-Wiladat ki khushi mein roshni
Woh tumhari gor-e-teerah jagmagaate jaayenge

Do jahaan ke Shah ki shahi sawaari aa gayi
Rahmaton ke woh khazaane ab lutaate jaayenge

Aa rahe hain Shaafi-e-Mahshar utho ae aasiyo!
Hum gunahgaaron ko Haq se bakhshwaate jaayenge

Ho gayi Subh-e-Bahaaraan kaif-aawar hai samaan
Khush naseebon ko woh ab jalwa dikhaate jaayenge

Subh-e-Saadiq ho gayi sab Aaminah ke ghar chalein
Noor ki barsaat hogi hum nahaate jaayenge

Zikr-e-Milaad-e-Mubaarak kaise chhodein hum bhala
Jin ka khaate hain unhein ke geet gaate jaayenge

Munaqid karte rahenge Ijtima-e-Zikr-o-Naat
Dhoom un ki Naat Khwaani ki machaate jaayenge

Kar lo niyyat khoob koshish karke hum apna amal
Madani Inaamaat par hardam badhaate jaayenge

Kar lo niyyat sunnaton ki tarbiyat ke waaste
Qaafilon mein hum safar karte karaate jaayenge

Khoob barsein gi janaaze par Khuda ki rahmatein
Qabr tak Sarkar ki naatein sunaate jaayenge