Mubarak ho Habib-e-Rab-e-Akbar aane wala hai

Andheron mein bhatakte phirne walon ko mubarak ho
Tumhein Haq se milane aaj Yawar aane wala hai

Mubarak badnaseebon ko, mubarak ho ghareebon ko
Jahan mein be-basoon ka saya-gustar aane wala hai

Karo ghar ghar charaghan, sabz parcham aaj lehrao
Macha do Marhaba ki dhoom, Dilbar aane wala hai

Tarawat kyun na ho hasil mere qalb-o-jigar ko
Jahan mein Bahr-e-Rahmat ka shanawar aane wala hai

Mubarak ho Haleema Sa'diyaؓ tujh ko mubarak ho
Teri godi mein kul Aalam ka Sarwar aane wala hai

Uthao sabz parcham aur chalo sab Aamina ke ghar
Lutane rahmatein Haq ka Payghambar aane wala hai

Agar na aaj jhoomo ge to kab jhoomo ge deewano
Machal jao, tumhara aaj Yawar aane wala hai

Jahan mein zulmaton ka chaak hoga aaj se seena
Khuda ke fazl se Maah-e-Munawwar aane wala hai

Tasalli to rakho, sairab bhi ho jaoge Attarؔ
Chhalkta jaam le kar Shah-e-Kausar aane wala hai