Fakhr-e-Deen O Fakhr-e-Millat, Sayyidi Ahmed Raza

Ka'bah-e-ahl-e-tariqat, Sayyidi Ahmed Raza
Aaftab-e-Qadriyat, Sayyidi Ahmed Raza

Al-ghiyaas ae mehr-e-tal'at, Sayyidi Ahmed Raza
Aa gaya phir daur-e-zulmat, Sayyidi Ahmed Raza

Chha rahi hai har taraf kufr-o-zilalat ki ghata
Hai pareshan hal ummat, Sayyidi Ahmed Raza

Dene wale dars-e-nazm-o-zabt hain khud muntasir
Hai alag sab ki jama'at, Sayyidi Ahmed Raza

Deen-e-haq par mitne wale jah par mitne lage
Hain shaheed-e-husn-e-daulat, Sayyidi Ahmed Raza

Al-gharaz koi hamara ab nahin pursan-e-hal
Ae Imam-e-Ahl-e-Sunnat, Sayyidi Ahmed Raza

Tang aakar aaj in himmat-shikan halat se
Dar pe laya hoon shikayat, Sayyidi Ahmed Raza

Kis se poochhein kaun batlaye, kahan jayen ghulam
Aap ki hai phir zaroorat, Sayyidi Ahmed Raza

Laaiye tashreef turbat se qalam dar kaf Huzoor
Kijiyo tajdeed-e-millat, Sayyidi Ahmed Raza

Aaiye bhatke huon ki rahbarii farmaiye
Khizr-e-rah-e-deen-o-sunnat, Sayyidi Ahmed Raza

Hum gaye guzre huon ko shan-o-shaukat ho naseeb
Phir ata ho auj-o-rif'at, Sayyidi Ahmed Raza

Hai yeh muddat se pareshan hal maddah-e-habeeb
Ik nazar ae abr-e-rahmat, Sayyidi Ahmed Raza

Hoon isi dar ka bhikari, hoon isi dar ka ghulam
Kijiyo chashm-e-inayat, Sayyidi Ahmed Raza

Kilk-e-anwar ki jawahir-reeziyon se phir Huzoor
Khol do chashm-e-baseerat, Sayyidi Ahmed Raza

Hurmat-e-rooh-e-payambar yak nazar kun sooye maa
Peshwa-e-Ahl-e-Sunnat, Sayyidi Ahmed Raza