Ik Buzurg-e-Paak Ki Hai Manqabat Ka Ihtimaam

Jhuk gaya auj-e-takhayyul ba-adab ba-ehtiraam
Aashiq-e-naam-e-Nabi ka aa gaya honton pe naam

Ae ameer-e-Ahl-e-Sunnat, ae shariat ke imam
As-salamu ae Sayyidi Sardar Ahmad as-salam

Ae faqeeh-e-azam o Shaikh-ul-Hadith-e-be-misaal
Wa'iz-e-sheereen maqāl o mufti-e-aali maqam

Ae mukammal ma'ni-e-noorani-e-Umm-ul-Kitab
Ae mujassam ittiba'-e-sunnat-e-Khair-ul-Anam

Martaba tera bhala tahreer mein kya aa sake
Ajz se hai sar ba-sajda asp-e-aql-e-tez-gam

Sarhad-e-takhayyul se hai is taraf manzil teri
Har had-e-idrak-e-shair se tira ooncha maqam

Hai teri ik ik ada aaina-e-hubb-e-Rasool
Hai tira har har nafas deewana-e-Shah-e-Anam

Sar se paa tak mazhar-e-shan-e-Shah-e-Ahmed Raza
Murshidi Hamid Raza ka yani aaina-e-tamam

Aaftab-e-noor-e-faiz-e-Mufti-e-Azam hai tu
Kaise Pak-o-Hind mein roshan na hota tera naam

Aaj phaili hain teri kirnein zameen-e-Hind tak
Hai bazahir sarzameen-e-Pak par tera qiyam

Somnath-e-Najd toda tu ne Lyallpur mein
Allah Allah teri zarb-e-As-Salatu Was-Salam

Panja-e-baatil maroda tu ne har shaitan ka
Bad-zaban, be-baak, gustaakhon ke munh mein di lagam

Tu hai Sunni ke liye paimana-e-aab-e-hayat
Aur Najdi ke liye sar ta paa tegh-e-be-niyam

Aaj Lyallpur goya mazhar-e-Islam hai
Ya bilfaz-e-digar hai markaz-e-har khas-o-am

Khas ishq-e-Mustafa ki bheek milti hai yahan
Faiz jari hai Shah-e-Ahmed Raza ka subh-o-sham

Ae shaheed-e-ishq, ae jaan-dada-e-naam-e-Habeeb
Tu ne rah-e-haq mein mit kar haq ko di umr-e-dawam