Sambhal Ja Ae Dil Muztar Madinah Aane Wala Hai

Qadam Ban Jaaye Mera Sar Madinah Aane Wala Hai
Bichhon Rah Mein Nazar Ban Kar Madinah Aane Wala Hai

Jo Dekhe Un Ka Naqsh-e-Pa Khuda Se Woh Nazar Maangun
Chiragh-e-Dil Chalun Le Kar Madinah Aane Wala Hai

Karam Un Ka Chala Yoon Dil Se Kehta Rah-e-Taibah Mein
Dil-e-Muztar Tasalli Kar Madinah Aane Wala Hai

Madinah Ki Nichhawar Hain Ye Mera Dil Meri Aankhen
Nichhawar Hoon Madinah Par Madinah Aane Wala Hai

Ilahi Main Talabgaar-e-Fana Hoon Khaak-e-Taibah Mein
Ilahi Kar Nisaar-e-Dar Madinah Aane Wala Hai

Madinah Ko Chala Main Be-Niyaaz-e-Rahbar-e-Manzil
Rah-e-Taibah Hai Khud Rahbar Madinah Aane Wala Hai

Mujhe Kheenche Liye Jaata Hai Shauq-e-Koocha-e-Janaan
Khincha Jaata Hoon Main Yaksar Madinah Aane Wala Hai

Woh Chamka Gunbad-e-Khazra Woh Shahr-e-Pur-Ziya Aaya
Dhale Ab Noor Mein Paikar Madinah Aane Wala Hai

Jahan Se Be-Khabar Ho Kar Chalo Khuld-e-Madinah Mein
Chalo Ab Hosh Ki Pi Kar Madinah Aane Wala Hai

Madine Mein Khule Baab-e-Hayat-e-Nau Ba-Tarz-e-Nau
Badal Daalo Kuhan Daftar Madinah Aane Wala Hai

Zara Ae Markab-e-Umr-e-Rawan Chal Barq Ki Soorat
Dikha Parwaaz Ke Johar Madinah Aane Wala Hai

Talabgaar-e-Madinah Tak Madinah Khud Hi Aa Jaaye
To Duniya Se Kinara Kar Madinah Aane Wala Hai

Madinah Aa Gaya Ab Dair Kya Hai Sirf Itni Si
Tu Khaali Kar Ye Dil Ka Ghar Madinah Aane Wala Hai

Falak Shayad Zameen Par Rah Gaya Khaak-e-Guzar Ban Kar
Bichhe Hain Rah Mein Akhtar Madinah Aane Wala Hai

Fizaayen Mehki Mehki Hain Hawaayen Bheeni Bheeni Hain
Basi Hai Kaisi Mushk-e-Tar Madinah Aane Wala Hai

Qamar Aaya Hai Shayad Un Ke Talwon Ki Ziya Lene
Bichha Hai Chaand Ka Bistar Madinah Aane Wala Hai

Muhammad ﷺ Ke Gada Kuch Farsh Waale Hi Nahin Dekho
Woh Aata Hai Shah-e-Khawar Madinah Aane Wala Hai