Zameen o zamaan tumhare liye, makeen o makaan tumhare liye

Dahan mein zabaan tumhare liye, badan mein hai jaan tumhare liye
Hum aaye yahaan tumhare liye, uthein bhi wahaan tumhare liye

Farishte khidam, rasool hisham, tamaam-e-umam ghulaam-e-karam
Wujood o adam, hudoos o qidam, jahaan mein ayaan tumhare liye

Kaleem o Naji, Maseeh o Safi, Khaleel o Razi, Rasool o Nabi
Ateeq o Wasi, Ghani o Ali, sana ki zabaan tumhare liye

Isaalat-e-kul, imaamat-e-kul, siyaadat-e-kul, imaarat-e-kul
Hukoomat-e-kul, wilaayat-e-kul, Khuda ke yahaan tumhare liye

Tumhari chamak, tumhari damak, tumhari jhalak, tumhari mehak
Zameen o falak, simaak o samak, mein sikka nishaan tumhare liye

Woh kanz-e-nihaan, yeh noor-e-fashaan, woh kun se ayaan, yeh bazm-e-fakaan
Yeh har tan o jaan, yeh baagh-e-jinaan, yeh saara samaan tumhare liye

Zuhoor-e-nihaan, qiyaam-e-jahaan, rukoo-e-mihaan, sujood-e-shahaan
Niyaazein yahaan, namaazein wahaan, yeh kis liye haan tumhare liye

Yeh shams o qamar, yeh shaam o sahar, yeh barg o shajar, yeh baagh o samar
Yeh tegh o sipar, yeh taaj o kamar, yeh hukm rawaan tumhare liye

Yeh faiz diye, woh jood kiye, ke naam liye zamaana jiye
Jahaan ne liye tumhare diye, yeh ikramiyaan tumhare liye

Sahaab-e-karam rawaana kiye, ke aab-e-ni'am zamaana piye
Jo rakhte the hum woh chaak siye, yeh satr-e-badaan tumhare liye

Sana ka nishaan, woh noor-fashaan, ke meh-rushaan ba-anhama shaan
Basaya-kashaan, mawaakib shaan, yeh naam o nishaan tumhare liye

Ataa-e-Arab, jalaaye karb, fuyooz-e-ajab baghair talab
Yeh rahmat-e-Rabb hai kis ke sabab, ba-Rabb-e-jahaan tumhare liye

Zunoob fana, uyyoob haba, quloob safa, khutoob rawa
Yeh khoob ataa, kuroob zuda, paye dil o jaan tumhare liye

Na jinn o bashar ke aathon pahar, malaaika dar pe basta kamar
Na jubba o sar ke qalb o jigar, hain sajda-kunaan tumhare liye

Na rooh-e-ameen, na arsh-e-bareen, na lauh-e-mubeen koi bhi kaheen
Khabar hi nahin jo ramzein khulein, azal ki nihaan tumhare liye

Jinaan mein chaman, chaman mein saman, saman mein phaban, phaban mein dulhan
Sazaaye mehan pe aise minan, yeh amn o amaan tumhare liye

Kamaal-e-mihaan, jalaal-e-shahaan, jamaal-e-hisaan mein tum ho ayaan
Ke saare jahaan mein roz-e-fakaan, zill-e-aaeena saan tumhare liye

Yeh Toor kuja, sipihr to kya, ke arsh-e-ula bhi door raha
Jihat se wara visaal mila, yeh rif'at-e-shaan tumhare liye

Khaleel o Naji, Maseeh o Safi, sabhi se kahi kaheen bhi bani
Yeh be-khabari ke khalq phiri, kahaan se kahaan tumhare liye

Ba-for-e-sada samaan yeh bandha, yeh sidrah utha woh arsh jhuka
Sufoof-e-sama ne sajda kiya, hui jo azaan tumhare liye

Yeh marhamatein ke kachchi matein, na chhodein latein na apni gatein
Qusoor karein aur un se bharein, qusoor-e-jinaan tumhare liye

Fana badarat, baqa babarat, ze har do jihat ba-gird-e-sarat
Hai markaziyyat tumhari sifat, ke donon kamaan tumhare liye

Ishaare se chaand cheer diya, chhupe hue khur ko pher liya
Gaye hue din ko asr kiya, yeh taab o tawaan tumhare liye