Sachchi Baat Sikhaate Yeh Hain

Doobi Naavein Taraate Yeh Hain
Hilti Neevein Jamaate Yeh Hain

Tooti Aasein Bandhaate Yeh Hain
Chhooti Nabzein Chalaate Yeh Hain

Jalti Jaanein Bujhaate Yeh Hain
Roti Aankhein Hansaate Yeh Hain

Qasr-e-Danaa Tak Kis Ki Rasai
Jaate Yeh Hain Aate Yeh Hain

Us Ke Naib Un Ke Sahib
Haq Se Khalq Milaate Yeh Hain

Shafi' Nafi' Rafi' Dafi'
Kya Kya Rahmat Laate Yeh Hain

Shafi'-e-Ummat Nafi'-e-Khalqat
Rafi' Rutbe Barhaate Yeh Hain

Dafi' Yaani Hafiz-o-Haami
Daf'-e-Bala Farmaate Yeh Hain

Faiz-e-Jaleel Khaleel Se Poochho
Aag Mein Baagh Khilaate Yeh Hain

Un Ke Naam Ke Sadqe Jis Se
Jeete Hum Hain Jilaate Yeh Hain

Us Ki Bakhshish Un Ka Sadqah
Deta Woh Hai Dilaate Yeh Hain

Un Ka Hukm Jahaan Mein Nafiz
Qabza Kul Pe Rakhaate Yeh Hain

Qadir-e-Kul Ke Naib-e-Akbar
Kin Ka Rang Dikhaate Yeh Hain

Un Ke Haath Mein Har Kunji Hai
Maalik-e-Kul Kehlaate Yeh Hain

Innaa A'tainakal Kauthar
Saari Kasrat Paate Yeh Hain

Rab Hai Mu'ti Yeh Hain Qasim
Rizq Us Ka Hai Khilaate Yeh Hain

Maatam Ghar Mein Ek Nazar Mein
Shaadi Shaadi Rachaate Yeh Hain

Apni Bani Hum Aap Bigaarein
Kaun Banaaye Banaate Yeh Hain

Laakhon Balaayein Karoron Dushman
Kaun Bachaaye Bachaate Yeh Hain

Bande Karte Hain Kaam Ghazab Ke
Muzhdah Raza Ka Sunaate Yeh Hain

Naza'-e-Rooh Mein Aasaani Dein
Kalimah Yaad Dilaate Yeh Hain

Marqad Mein Bandon Ko Thapak Kar
Meethi Neend Sulaate Yeh Hain

Baap Jahaan Bete Se Bhaage
Lutf Wahaan Farmaate Yeh Hain

Maan Jab Aklote Ko Chhode
Aa Aa Keh Ke Bulaate Yeh Hain

Sankhon Bekas Rone Waale
Kaun Chhupaaye Chhupaate Yeh Hain

Khud Sajde Mein Gir Kar Apni
Girti Ummat Uthaate Yeh Hain

Nangon Be-Nangon Ka Pardah
Daaman Dhak Ke Chhupaate Yeh Hain

Apne Bharam Se Hum Halkon Ka
Palla Bhaari Banaate Yeh Hain

Thanda Thanda Meetha Meetha
Peete Hum Hain Pilaate Yeh Hain

Sallim Sallim Ki Dhaaras Se
Pul Par Hum Ko Chalaate Yeh Hain

Jis Ko Koi Na Khulwa Sakta
Woh Zanjeer Hilaate Yeh Hain

Jin Ke Chhappar Tak Nahin Oon Ke
Moti Mahal Sajwaate Yeh Hain

Topi Jin Ke Na Jooti Un Ko
Taaj-o-Buraaq Dilaate Yeh Hain