Baray Lateef Hain Naazuk Se Ghar Mein Rehtay Hain

Hamaray Dil Mein Hamaray Jigar Mein Rehtay Hain
Unhi Ke Ghar Hain Ye Woh Apnay Ghar Mein Rehtay Hain

Ye Waqia Hai Libaas-e-Bashar Bhi Dhoka Hai
Ye Mojiza Hai Libaas-e-Bashar Mein Rehtay Hain

Maqaam Un Ka Na Farsh-e-Zameen Na Arsh-e-Bareen
Woh Apnay Chahnay Walon Ke Ghar Mein Rehtay Hain

Malaaika Bhi Aqeedat Se Dekhtay Hain Unhein
Jo Khush Naseeb Nabi ﷺ Ke Nagar Mein Rehtay Hain

Yaqeen Walay Kahaan Se Chalay Kahaan Pohanchay
Jawahil Shak Hain Agar Mein Magar Mein Rehtay Hain

Khuda Ke Noor Ko Apni Tarah Samajhtay Hain
Ye Kaun Log Hain Kis Ke Asar Mein Rehtay Hain

Rahain Woh Apnon Se Ghaafil Aray Ma'aaz Allah
Khusha Naseeb Hum Un Ki Nazar Mein Rehtay Hain

Woh Aur Hi Tha Jo Qausain Par Nazar Aaya
Malak To Apni Had-e-Baal-o-Par Mein Rehtay Hain