Subah Taiba Mein Hui Batta Hai Baara Noor Ka

Baagh-e-Taiba Mein Suhana Phool Phoola Noor Ka
Mast-e-Boo Hain Bulbulen Parhti Hain Kalima Noor Ka

Barahveen Ke Chaand Ka Mujra Hai Sajda Noor Ka
Barah Burjon Se Jhuka Aik Ik Sitaara Noor Ka

Un Ke Qasr-e-Qadr Se Khuld Aik Kamrah Noor Ka
Sidrah Paayen Baagh Mein Nanha Sa Poda Noor Ka

Arsh Bhi Firdaus Bhi Us Shah-e-Wala Noor Ka
Yeh Musamman Burj Woh Mushku-e-A'la Noor Ka

Aayi Bid'at Chhayi Zulmat Rang Badla Noor Ka
Maah-e-Sunnat Mehr-e-Tal'at Le Le Badla Noor Ka

Tere Hi Maathe Raha Ae Jaan Sehra Noor Ka
Bakht Jaaga Noor Ka Chamka Sitaara Noor Ka

Main Gada Tu Badshah Bhar De Piyala Noor Ka
Noor Din Doona Tera De Daal Sadqa Noor Ka

Teri Hi Janib Hai Paanchon Waqt Sajda Noor Ka
Rukh Hai Qibla Noor Ka Abroo Hai Ka'bah Noor Ka

Pusht Par Dhalka Sar-e-Anwar Se Shamla Noor Ka
Dekhen Moosa Toor Se Utra Saheefa Noor Ka

Taaj Waale Dekh Kar Tera Imamah Noor Ka
Sar Jhukate Hain Ilahi Bol Bala Noor Ka

Beeni-e-Purnoor Par Rakhshan Hai Bukkah Noor Ka
Hai Liwa-ul-Hamd Par Urta Phareera Noor Ka

Mushaf-e-Ariz Par Hai Khat-e-Shafee'ah Noor Ka
Lo Siyah Kaaro Mubarak Ho Qabalah Noor Ka

Aab-e-Zar Banta Hai Ariz Par Paseena Noor Ka
Mushaf-e-I'jaaz Par Charhta Hai Sona Noor Ka

Paich Karta Hai Fida Hone Ko Lam'ah Noor Ka
Gard-e-Sar Phirne Ko Banta Hai Imamah Noor Ka

Haibat-e-Ariz Se Tharata Hai Shola Noor Ka
Kafsh-e-Pa Par Gir Ke Ban Jata Hai Guppha Noor Ka

Sham-e-Dil Mishkaat Tan Seena Zuja Jah Noor Ka
Teri Soorat Ke Liye Aaya Hai Soorah Noor Ka

Mail Se Kis Darjah Suthra Hai Woh Putla Noor Ka
Hai Gale Mein Aaj Tak Kora Hi Kurta Noor Ka

Tere Aage Khaak Par Jhukta Hai Maatha Noor Ka
Noor Ne Paya Tere Sajde Se Seema Noor Ka

Tu Hai Saaya Noor Ka Har Uzv Tukra Noor Ka
Saaya Ka Saaya Na Hota Hai Na Saaya Noor Ka

Kya Bana Naam-e-Khuda Asra Ka Doolha Noor Ka
Sar Pe Sehra Noor Ka Bar Mein Shahana Noor Ka

Bazm-e-Wahdat Mein Maza Hoga Dobala Noor Ka
Milne Sham-e-Toor Se Jata Hai Ikka Noor Ka

Wasf-e-Rukh Mein Gaati Hain Hooren Tarana Noor Ka
Qudrati Beenon Mein Kya Bajta Hai Lehra Noor Ka

Yeh Kitab-e-Kun Mein Aaya Turfah Aayah Noor Ka
Ghair-e-Qail Kuch Na Samjha Koi Ma'na Noor Ka

Dekhne Walon Ne Kuch Dekha Na Bhala Noor Ka
Man Ra'a Kaisa Yeh Aaina Dikhaya Noor Ka

Subah Kar Di Kufr Ki Sacha Tha Muzdah Noor Ka
Shaam Hi Se Tha Shab-e-Teerah Ko Dharka Noor Ka

Parti Hai Noori Bharan Umda Hai Dariya Noor Ka
Sar Jhuka Ae Kishti-e-Kufr Aata Hai Ahla Noor Ka

Nariyon Ka Daur Tha Dil Jal Raha Tha Noor Ka
Tum Ko Dekha Ho Gaya Thanda Kaleja Noor Ka

Naskh Adiyan Kar Ke Khud Qabzah Bithaya Noor Ka
Taajwar Ne Kar Liya Kachcha Ilaqah Noor Ka

Jo Gada Dekho Liye Jata Hai Tora Noor Ka
Noor Ki Sarkar Hai Kya Is Mein Tora Noor Ka

Bheek Le Sarkar Se La Jald Kasah Noor Ka
Maah-e-Nau Taiba Mein Batta Hai Maheena Noor Ka

Dekh Un Ke Hote Nazeeba Hai Da'wa Noor Ka
Mehr Likh De Yaan Ke Zarron Ko Muchalka Noor Ka

Yaan Bhi Daagh-e-Sajda-e-Taiba Hai Tamgha Noor Ka
Ae Qamar Kya Tere Hi Mathe Hai Teeka Noor Ka

Sham Saan Aik Aik Parwana Hai Is Ba-Noor Ka
Noor-e-Haq Se Lo Lagaye Dil Mein Rishta Noor Ka

Anjuman Waale Hain Anjum Bazm Halqah Noor Ka
Chaand Par Taron Ke Jhurmat Se Hai Halah Noor Ka

Teri Nasl-e-Pak Mein Hai Bachcha Bachcha Noor Ka
Tu Hai Ain-e-Noor Tera Sab Gharana Noor Ka

Noor Ki Sarkar Se Paya Doshala Noor Ka
Ho Mubarak Tum Ko Zun-Noorain Jora Noor Ka

Kis Ke Parde Ne Kiya Aaina Andha Noor Ka
Mangta Phirta Hai Aankhen Har Nageena Noor Ka

Ab Kahan Woh Tabishen Kaisa Woh Tarka Noor Ka
Mehr Ne Chhup Kar Kiya Khasa Dhundalka Noor Ka

Tum Muqabil The To Pehron Chaand Barhta Noor Ka
Tum Se Chhut Kar Munh Nikal Aaya Zara Sa Noor Ka

Qabr-e-Anwar Kahiye Ya Qasr-e-Mu'alla Noor Ka
Charkh-e-Atlas Ya Koi Sada Sa Qubbah Noor Ka

Aankh Mil Sakti Nahin Dar Par Hai Pehra Noor Ka
Taab Hai Be Hukm Par Mare Parindah Noor Ka

Naz'a Mein Lautega Khaak-e-Dar Pe Shaida Noor Ka
Mar Ke Orhegi Aroos-e-Jaan Dupatta Noor Ka

Taab-e-Mehr-e-Hashr Se Chaunke Na Kushtah Noor Ka
Boondiyan Rahmat Ki Dene Aaein Chheenta Noor Ka

Waz'-e-Wazi' Mein Teri Soorat Hai Ma'ni Noor Ka
Yun Majazan Chahein Jis Ko Keh Dein Kalima Noor Ka

Anbiya Ajza Hain Tu Bilkul Hai Jumla Noor Ka
Us Ilaqe Se Hai Un Par Naam Sachcha Noor Ka

Yeh Jo Mehr-o-Mah Pe Hai Itlaq Aata Noor Ka
Bheek Tere Naam Ki Hai Isti'arah Noor Ka

Surmagin Aankhen Hareem-e-Haq Ke Woh Mushkeen Ghazal
Hai Faza-e-Lamakan Tak Jin Ka Ramna Noor Ka

Taab-e-Husn-e-Garm Se Khul Jayenge Dil Ke Kanwal
Nau Baharen Layega Garmi Ka Jhalka Noor Ka

Zarre Mehr-e-Quds Tak Tere Tawassut Se Gaye
Hadd-e-Ausat Ne Kiya Sughra Ko Kubra Noor Ka

Sabzah-e-Gardoon Jhuka Tha Bahr-e-Pa Bos-e-Buraq
Phir Na Seedha Ho Saka Khaya Woh Kora Noor Ka

Taab-e-Sam Se Chaundhiya Kar Chaand Unhen Qadmon Phira
Hans Ke Bijli Ne Kaha Dekha Chhalawa Noor Ka

Deed-e-Naqsh-e-Sum Ko Nikli Saat Pardon Se Nigah
Putliyan Bolin Chalo Aaya Tamasha Noor Ka

Aks-e-Sam Ne Chaand Sooraj Ko Lagaye Chaar Chaand
Par Gaya Seem-o-Zar-e-Gardoon Pe Sikkah Noor Ka

Chaand Jhuk Jata Jidhar Ungli Uthate Mehd Mein
Kya Hi Chalta Tha Isharon Par Khilona Noor Ka

Aik Seena Tak Mushabah Aik Wahan Se Paon Tak
Husn-e-Sibtain Un Ke Jaamon Mein Hai Neemah Noor Ka

Saaf Shakl-e-Pak Hai Donon Ke Milne Se Ayan
Khat Tawam Mein Likha Hai Yeh Do Waraqah Noor Ka

Ka Geesu, Ha Dahan, Ya Abroo, Aankhen Ain Saad
Kaaf Haa Yaa Ain Saad Un Ka Hai Chehra Noor Ka