Shukr-e-Khuda Keh Aaj Gharri Us Safar Ki Hai

Garmi Hai, Tap Hai, Dard Hai, Kulfat Safar Ki Hai
Naa-Shukr Yeh To Dekh Azmat Kidhar Ki Hai

Kis Khaak-e-Paak Ki Tu Bani Khaak-e-Paa Shifa
Tujh Ko Qasam Janaab-e-Maseeha Ke Sar Ki Hai

Aab-e-Hayaat Rooh Hai Zarqaa Ki Boond Boond
Akseer-e-Aazam Mas Dil-e-Khaak-e-Dar Ki Hai

Hum Ko To Apne Saaye Mein Aaraam Hi Se Laaye
Heele Bahaane Waalo Ko Yeh Raah Dar Ki Hai

Lutte Hain Maare Jaate Hain Yoon Hi Suna Kiye
Har Baar Di Woh Amn Keh Ghairat Hazar Ki Hai

Woh Dekho Jagmagaati Hai Shab Aur Qamar Abhi
Pehron Nahin Keh Bast-o-Chahaarum Safar Ki Hai

Maah-e-Madinah Apni Tajalli Ata Kare
Yeh Dhalti Chaandni To Pehar Do Pehar Ki Hai

Man Zaara Turbati Wajabat Lahu Shafa'ati
Un Par Durood Jin Se Naveed In Bashar Ki Hai

Us Ke Tufail Hajj Bhi Khuda Ne Kara Diye
Asl-e-Muraad Haazri Us Paak Dar Ki Hai

Ka'bah Ka Naam Tak Na Liya Taibah Hi Kaha
Poochha Tha Hum Se Jis Ne Keh Nahzat Kidhar Ki Hai

Ka'bah Bhi Hai Inhi Ki Tajalli Ka Ek Zill
Roshan Inhi Ke Aks Se Putli Hajar Ki Hai

Hote Kahaan Khaleel-o-Bina Ka'bah-o-Mina
Lolaak Waale Saahibi Sab Tere Ghar Ki Hai

Maula Ali Ne Waari Teri Neend Par Namaaz
Aur Woh Bhi Asr Sab Se Jo A'la Khatar Ki Hai

Siddiq Balki Ghaar Mein Jaan Us Pe De Chuke
Aur Hifz-e-Jaan To Jaan Farooz-e-Ghurar Ki Hai

Haan Tu Ne Un Ko Jaan Unhein Pher Di Namaaz
Par Woh To Kar Chuke The Jo Karni Bashar Ki Hai

Saabit Hua Keh Jumla Faraaiz Furoo Hain
Asl-ul-Usool Bandagi Us Taajwar Ki Hai

Shar Khair Shor Soor Sharar Door Naar Noor
Bushra Keh Baargaah Yeh Khair-ul-Bashar Ki Hai

Mujrim Bulaaye Aaye Hain Jaa'ook Hai Gawaah
Phir Rad Ho Kab Yeh Shaan Kareemon Ke Dar Ki Hai

Bad Hain Magar Unhi Ke Hain Baaghi Nahin Hain Hum
Najdi Na Aaye Us Ko Yeh Manzil Khatar Ki Hai

Taf Najdiyyat Na Kufr Na Islam Sab Pe Harf
Kaafir Idhar Ki Hai Na Udhar Ki Adhar Ki Hai

Haakim Hakeem Daad-o-Dawa Dein Yeh Kuchh Na Dein
Mardood Yeh Muraad Kis Aayat, Khabar Ki Hai

Shakl-e-Bashar Mein Noor-e-Ilahi Agar Na Ho
Kya Qadr Us Khameerah-e-Maa-o-Madar Ki Hai

Noor-e-Ilah Kya Hai Muhabbat Habeeb Ki
Jis Dil Mein Yeh Na Ho Woh Jagah Khook-o-Khar Ki Hai

Zikr-e-Khuda Jo Un Se Juda Chaaho Najdiyo
Wallah Zikr-e-Haq Nahin Kunji Saqar Ki Hai

Be Un Ke Waasitah Ke Khuda Kuchh Ata Kare
Haasha Ghalat Ghalat Yeh Hawas Be-Basar Ki Hai

Maqsood Yeh Hain Adam-o-Nooh-o-Khaleel Se
Tukhm-e-Karam Mein Saari Karaamat Samar Ki Hai

Un Ki Nabuwat Un Ki Uboowat Hai Sab Ko Aam
Umm-ul-Bashar Aroos Unhi Ke Pisar Ki Hai

Zaahir Mein Mere Phool Haqeeqat Mein Mere Nakhl
Is Gul Ki Yaad Mein Yeh Sada Bool-Bashar Ki Hai

Pehle Ho Un Ki Yaad Keh Paaye Jila Namaaz
Yeh Kehti Hai Azaan Jo Pichhle Pehar Ki Hai

Duniya Mazaar Hashr Jahaan Hain Ghafoor Hain
Har Manzil Apne Chaand Ki Manzil Ghafar Ki Hai

Un Par Durood Jin Ko Hajar Tak Karen Salaam
Un Par Salaam Jin Ko Tahiyyat Shajar Ki Hai

Un Par Durood Jin Ko Kasi-e-Be-Kasaan Kahein
Un Par Salaam Jin Ko Khabar Be-Khabar Ki Hai

Jinn-o-Bashar Salaam Ko Haazir Hain As-Salaam
Yeh Baargaah Maalik-e-Jinn-o-Bashar Ki Hai

Shams-o-Qamar Salaam Ko Haazir Hain As-Salaam
Khoobi Inhi Ki Jot Se Shams-o-Qamar Ki Hai

Sab Bahr-o-Bar Salaam Ko Haazir Hain As-Salaam
Tamleek Inhi Ke Naam To Har Bahr-o-Bar Ki Hai

Sang-o-Shajar Salaam Ko Haazir Hain As-Salaam
Kalime Se Tar Zabaan Daraakht-o-Hajar Ki Hai

Arz-o-Asar Salaam Ko Haazir Hain As-Salaam
Malja Yeh Baargaah Dua-o-Asar Ki Hai

Shoreedah Sar Salaam Ko Haazir Hain As-Salaam
Raahat Inhi Ke Qadmon Mein Shoreedah Sar Ki Hai

Khastah Jigar Salaam Ko Haazir Hain As-Salaam
Marham Yaheen Ki Khaak To Khastah Jigar Ki Hai

Aansoo Baha Keh Beh Gaye Kaale Gunah Ke Dher
Haathi Dubaao Jheel Yahaan Chashm-e-Tar Ki Hai

Teri Qaza Khaleefa-e-Ahkaam-e-Zil-Jalaal
Teri Raza Haleef-e-Qaza-o-Qadar Ki Hai

Yeh Pyaari Pyaari Kiyaari Tere Khaanah Bagh Ki
Sard Is Ki Aab-o-Taab Se Aatish Saqar Ki Hai

Jannat Mein Aa Ke Naar Mein Jaata Nahin Koi
Shukr-e-Khuda Naveed-e-Najaat-o-Zafar Ki Hai

Momin Hoon Mominon Pe Raoof-ur-Raheem Ho
Saa'il Hoon Saa'ilon Ko Khushi La Nahar Ki Hai

Daaman Ka Waasitah Mujhe Us Dhoop Se Bacha
Mujh Ko To Shaaq Jaarron Mein Is Dopahar Ki Hai

Maan Donon Bhaai Bete Bhatije Azeez Dost
Sab Tujh Ko Saunpe Milk Hi Sab Tere Ghar Ki Hai

Jin Jin Muraadon Ke Liye Ahbaab Ne Kaha
Pesh-e-Khabeer Kya Mujhe Haajat Khabar Ki Hai

Fazl-e-Khuda Se Ghaib Shahadat Hua Inhen
Is Par Shahadat Aayat-o-Wahy-o-Asar Ki Hai

Kehna Na Kehne Waale The Jab Se Tu Ittila'
Maula Ko Qaul-o-Qaa'il-o-Har Khushk-o-Tar Ki Hai

Un Par Kitaab Utri Bayaanan Li-Kulli Shay'
Tafseel Jis Mein Maa Abaro Wa Maa Ghabar Ki Hai

Aage Rahi Ata Woh Ba-Qadr-e-Talab To Kya
Aadat Yahaan Umeed Se Bhi Be-Shtar Ki Hai

Be-Maange Dene Waale Ki Ne'mat Mein Gharq Hain
Maange Se Jo Mile Kise Fahm Is Qadar Ki Hai

Ahbaab Us Se Barh Ke To Shaayad Na Paayen Arz
Na-Kardah Arz Arz Yeh Tarz-e-Digar Ki Hai

Dandaan Ka Naat-Khwaan Hoon Na Paayaab Hogi Aab
Nadi Gale Gale Mere Aab-e-Guhar Ki Hai

Dasht-e-Haram Mein Rehne De Sayyaad Agar Tujhe
Mitti Azeez Bulbul-e-Be-Baal-o-Par Ki Hai

Yaa Rabb Raza Na Ahmad Pareenah Ho Ke Jaaye
Yeh Baargaah Tere Habeeb-e-Akbar Ki Hai

Taufeeq De Keh Aage Na Paida Ho Khoo-e-Bad
Tabdeel Kar Jo Khaslat-e-Bad Pesh-Tar Ki Hai