Sab Se Aula O Aala Hamara Nabi

Apne Maula Ka Pyara Hamara Nabi
Dono Aalam Ka Dulha Hamara Nabi

Bazm-e-Aakhir Ka Sham-e-Farozan Hua
Noor-e-Awwal Ka Jalwa Hamara Nabi

Jis Ko Shayan Hai Arsh-e-Khuda Par Juloos
Hai Woh Sultan-e-Wala Hamara Nabi

Bujh Gayin Jis Ke Aage Sabhi Mashalen
Shama Woh Le Kar Aaya Hamara Nabi

Jis Ke Talwon Ka Dhoowan Hai Aab-e-Hayat
Hai Woh Jaan-e-Masiha Hamara Nabi

Arsh O Kursi Ki Thin Aaina Bandiyan
Su-e-Haq Jab Sudhara Hamara Nabi

Khalq Se Auliya, Auliya Se Rusul
Aur Rasoolon Se Aala Hamara Nabi

Husn Khata Hai Jis Ke Namak Ki Qasam
Woh Maleeh-e-Dil Aara Hamara Nabi

Zikr Sab Pheeke Jab Tak Na Mazkoor Ho
Namakeen Husn Wala Hamara Nabi

Jis Ki Do Boonden Hain Kausar O Salsabeel
Hai Woh Rahmat Ka Darya Hamara Nabi

Jaise Sab Ka Khuda Ek Hai Waise Hi
Un Ka, Un Ka, Tumhara Hamara Nabi

Qarnon Badli Rasoolon Ki Hoti Rahi
Chaand Badli Ka Nikla Hamara Nabi

Kaun Deta Hai, Dene Ko Munh Chahiye
Dene Wala Hai Sachcha Hamara Nabi

Kya Khabar Kitne Tare Khile Chhup Gaye
Par Na Doobe Na Dooba Hamara Nabi

Mulk-e-Kaunain Mein Anbiya Tajdar
Tajdaron Ka Aaqa Hamara Nabi

La-Makan Tak Ujala Hai Jis Ka Woh Hai
Har Makan Ka Ujala Hamara Nabi

Sare Achchon Mein Achcha Samajhiye Jise
Hai Us Achche Se Achcha Hamara Nabi

Sare Oonchon Mein Ooncha Samajhiye Jise
Hai Us Oonche Se Ooncha Hamara Nabi

Anbiya Se Karun Arz Kyun Maliko!
Kya Nabi Hai Tumhara Hamara Nabi

Jis Ne Tukde Kiye Hain Qamar Ke Woh Hai
Noor-e-Wahdat Ka Tukda Hamara Nabi

Sab Chamak Wale Ujalon Mein Chamka Kiye
Andhe Sheeshon Mein Chamka Hamara Nabi

Jis Ne Murdah Dilon Ko Di Umr-e-Abad
Hai Woh Jaan-e-Masiha Hamara Nabi