Ya Nabi Hind mein hum thokarein khayen kab tak

Aankhen pathra gayin ab raah bahut dekh chuke
Sakhtiyan dard-e-judai ki uthayen kab tak

Phir ke aate hain jo zaair hamein karte hain khajal
Baat bigri hui logon se banayen kab tak

Saaf matla' ho dikhao hamein umeed ka din
Gehri gehri shab-e-gham ki yeh ghataayen kab tak

Ashk-e-gham ruk nahin sakta hai, kahan tak rokein
Dard-e-dil chhup nahin sakta hai, chhupayen kab tak

Nahin milti hamein duniya ke bakheron se nijaat
Ya Nabi gard rahengi yeh balaayen kab tak

Kijiye waada bulane ka ke ab taab nahin
Kahiye badlengi mukhalif yeh hawaayen kab tak