Salle Ala Ka Lab Pe Hai Gulshan Khila Hua

Tareekh iztirab ke aalam mein hai, Huzoor
Aqwam-e-arz-e-shab ka badan hai juda hua

Tufan-e-tund-o-teez mein sadiyon se, Ya Nabi
Kaghaz ki kashtiyon ka hai bera ghira hua

Aaqa, hawa-e-adl muqaffal hai in dinon
Mahshar diyar-e-lauh-o-qalam mein bapa hua

Ummat khari hai zar ki tapish ke hisar mein
Is ka barahna sar bhi hai kab se jhuka hua

Is asr-e-nau ko ajz ki chadar ata karein
Har aina hai gard-e-ana mein ata hua

Dharkan har ek un se hai mansoob is liye
Khak-e-dar-e-Rasool se hai dil bana hua

Khushbu tawaf mere qalam ka kiya kare
Honton pe is ke ism-e-Nabi hai saja hua

Chehra to is ka janib-e-shehr-e-Nabi karo
Dekho! chiragh-e-shab hai abhi se bujha hua

Har har qadam pe, zair-e-Taiba, zar-e-adab
Tujh ko mile ga rahguzar mein para hua

Ankhon ne bhi durood hai bheja tamam shab
Sehn-e-jawar-e-deeda-o-dil hai dhula hua

Ek kaif-e-sarmadi ka tawatur se hai nuzool
Naat-e-Nabi ka ho ga dareecha khila hua

Hum log dasht-e-khauf mein tanha hain is tarah
Sehra mein jaise dhoop ka sehra bichha hua

Dast-e-saba pe chand ki kirnon ne rakh diya
Ashk-e-rawan se mera qaseeda likha hua

Darta hoon mein, Huzoor, na jaye bhatak kahin
Ansu hai ek chashm-e-ghazal mein ruka hua