Huzoor Aqdas ﷺ apni azwaaj-e-mutahharat, apne ahbaab, apne ashaab, apne rishtedaron, apne parosiyon, har ek ke saath itni khush akhlaaqi aur milansari ka bartao farmate the ke un mein se har ek Aap ke akhlaaq-e-hasanah ka gareeda aur maddah tha.
Khadim-e-khaas Hazrat Anas Raziyallahu Ta'ala Anhu ka bayan hai ke main ne das baras tak safar-o-watan mein Huzoor ﷺ ki khidmat ka sharaf hasil kiya, magar kabhi bhi Huzoor ﷺ ne na mujhe daanta, na jhirka aur na kabhi yeh farmaya ke tu ne falan kaam kyun kiya aur falan kaam kyun nahin kiya?
Hazrat Ayesha Raziyallahu Ta'ala Anha kehti hain ke Huzoor ﷺ se zyada koi khush akhlaaq nahin tha. Aap ke ashaab ya Aap ke ghar walon mein se jo koi bhi Aap ko pukarta to Aap "Labbaik" (haazir janaab) keh kar jawab dete.
Hazrat Jarir Raziyallahu Ta'ala Anhu farmate hain ke main jab se Musalman hua kabhi bhi Huzoor ﷺ ne mujhe paas aane se nahin roka aur jis waqt bhi mujhe dekhte to muskura dete. Aur Aap apne ashaab se khush-tab'i bhi farmate aur sab ke saath mil jul kar rehte aur har ek se guftagu farmate. Aur Sahaba-e-Kiram ke bachon se bhi khush-tab'i farmate aur un bachon ko apni muqaddas god mein bitha lete. Aur azaad, neez londi, ghulam aur miskeen sab ki daawatein qubool farmate aur Madinah ke intehai hisse mein rehne wale mareezon ki bimar pursi ke liye tashreef le jaate aur uzr pesh karne walon ke uzr qubool farmate.
Hazrat Anas Raziyallahu Ta'ala Anhu raawi hain ke agar koi shakhs Huzoor ﷺ ke kaan mein koi sargoshi ki baat karta to Aap us waqt tak apna sar us ke munh se alag na farmate jab tak woh kaan mein kuch kehta rehta. Aur Aap apne ashaab ki majlis mein kabhi paaon phaila kar nahin baithte the. Aur jo Aap ke saamne aata Aap salaam karne mein pehl karte aur mulaqatiyon se musafaha farmate. Aur aksar auqaat apne paas aane wale mulaqatiyon ke liye Aap apni chaadar-e-mubarak bichha dete aur apni masnad bhi pesh kar dete. Aur apne ashaab ko un ki kuniyaton aur achhe naamon se pukarte. Kabhi kisi baat karne wale ki baat ko kaatte nahin the. Har shakhs se khush-rooi ke saath muskura kar mulaqat farmate.
Madinah ke khuddam aur naukar-chaakar bartanon mein subah ko paani le kar aate taa ke Huzoor ﷺ un ke bartanon mein apna muqaddas haath dubo dein aur paani mutabarrak ho jaaye. To sakht jaare ke mausam mein bhi subah ko Huzoor ﷺ har ek ke bartan mein apna muqaddas haath daal diya karte the aur jaare ki sardi ke bawajood kisi ko mehroom nahin farmate the.
Akhlaaq-e-Rasool ﷺ ke Roshan Pehlu – 2. Husn-e-Muasharat
اخلاقِ رسولﷺ کے روشن پہلو - 2۔حسنِ معاشرت
حضور اقدس صلی اللہ تعالی علیہ و سلم اپنی ازواج مطہرات، اپنے احباب، اپنے اصحاب، اپنے رشتہ داروں، اپنے پڑوسیوں ہر ایک کے ساتھ اتنی خوش اخلاقی اور ملنساری کا برتاؤ فرماتے تھے کہ ان میں سے ہر ایک آپ کے اخلاق حسنہ کا گرویدہ اور مداح تھا۔
خادم خاص حضرت انس رضی اللہ تعالیٰ عنہ کا بیان ہے کہ میں نے دس برس تک سفر و وطن میں حضور صلی اللہ تعالٰی علیہ وسلم کی خدمت کا شرف حاصل کیا مگر کبھی بھی حضور صلی اللہ تعالی علیہ وسلم نے نہ مجھے ڈانٹا نہ جھڑکا اور نہ کبھی یہ فرمایا کہ تو نے فلاں کام کیوں کیا اور فلاں کام کیوں نہیں کیا؟
حضرت عائشہ رضی اللہ تعالیٰ عنہا کہتی ہیں کہ حضور صلی اللہ تعالٰی علیہ وسلم سے زیادہ کوئی خوش اخلاق نہیں تھا آپ کے اصحاب یا آپ کے گھر والوں میں سے جو کوئی بھی آپ کو پکارتا تو آپ لبیک (حاضر جناب ) کہہ کر جواب دیتے۔
حضرت جریر رضی اللہ تعالی عنہ فرماتے ہیں کہ میں جب سے مسلمان ہوا کبھی بھی حضور صلی اللہ تعالی علیہ وسلم نے مجھے پاس آنے سے نہیں روکا اور جس وقت بھی مجھے دیکھتے تو مسکرا دیتے اور آپ اپنے اصحاب سے خوش طبعی بھی فرماتے اور سب کے ساتھ مل جل کر رہتے اور ہر ایک سے گفتگو فرماتے اور صحابہ کرام کے بچوں سے بھی خوش طبعی فرماتے اور ان بچوں کو اپنی مقدس گود میں بٹھا لیتے، اور آزاد نیز لونڈی غلام اور مسکین سب کی دعوتیں قبول فرماتے اور مدینہ کے انتہائی حصہ میں رہنے والے مریضوں کی بیمار پرسی کے لیے تشریف لے جاتے اور عذر پیش کرنے والوں کے عذر قبول فرماتے۔
حضرت انس رضی اللہ تعالی عنہ راوی ہیں کہ اگر کوئی شخص حضور صلی اللہ تعالی علیہ وسلم کے کان میں کوئی سرگوشی کی بات کرتا تو آپ اس وقت تک اپنا سر اس کے منھ سے الگ نہ فرماتے جب تک وہ کان میں کچھ کہتا رہتا۔ اور آپ اپنے اصحاب کی مجلس میں کبھی پاؤں پھیلا کر نہیں بیٹھتے تھے۔ اور جو آپ کے سامنے آتا آپ سلام کرنے میں پہل کرتے اور ملاقاتیوں سے مصافحہ فرماتے اور اکثر اوقات اپنے پاس آنے والے ملاقاتیوں کے لیے آپ اپنی چادر مبارک بچھا دیتے اور اپنی مسند بھی پیش کر دیتے اور اپنے اصحاب کو ان کی کنیتوں اور اچھے ناموں سے پکارتے۔ کبھی کسی بات کرنے والے کی بات کو کاٹتے نہیں تھے۔ ہر شخص سے خوشروئی کے ساتھ مسکرا کر ملاقات فرماتے۔
مدینہ کے خدام اور نوکر چاکر برتنوں میں صبح کو پانی لے کر آتے تاکہ حضور صلی اللہ تعالٰی علیہ وسلم ان کے برتنوں میں اپنا مقدس ہاتھ ڈبو دیں اور پانی متبرک ہو جائے تو سخت جاڑے کے موسم میں بھی صبح کو حضور صلی اللہ تعالی علیہ وسلم ہر ایک کے برتن میں اپنا مقدس ہاتھ ڈال دیا کرتے تھے اور جاڑے کی سردی کے باوجود کسی کو محروم نہیں فرماتے تھے۔
