Barakaat-e-Nubuwwat Ka Zuhur

Jis tarah sooraj nikalne se pehle sitaron ki roposhi, Subh-e-Sadiq ki safedi aur shafaq ki surkhi sooraj nikalne ki khushkhabri dene lagti hain, isi tarah jab Aaftab-e-Risalat ke tulu’ ka zamana qareeb aa gaya to atraaf-e-aalam mein bohat se aise ajeeb-o-ghareeb waqiaat aur khawariq-e-aadaat batoor-e-alaamaat zahir hone lage jo saari kainaat ko jhanjhor jhanjhor kar yeh bisharat dene lage ke ab Risalat ka Aaftab apni poori aab-o-taab ke saath tulu’ hone wala hai.

Chunanche Ashaab-e-Feel ki halaakat ka waqia, nagahaan baaran-e-rahmat se sarzameen-e-Arab ka sarsabz-o-shadaab ho jaana aur barson ki khushk-saali dafa’ ho kar poore mulk mein khushhaali ka daur daura ho jaana, buton ka munh ke bal gir parna, Faaris ke Majoosiyon ki ek hazaar saal se jalai hui aag ka ek lamhe mein bujh jaana, Kisra ke mahal ka zalzalah aur us ke chaudah kanguron ka munhadim ho jaana, Hamdaan aur Qum ke darmiyan chhe meel lambe aur chhe meel chaude Bahirah-e-Sawah ka yakayak bilkul khushk ho jaana, Shaam aur Koofah ke darmiyan Waadi-e-Samawah ki khushk nadi ka achanak jaari ho jaana, Huzoor ﷺ ki walidah ke badan se ek aise noor ka nikalna jis se Busra ke mahal roshan ho gaye, yeh sab waqiaat usi silsilah ki kariyan hain jo Huzoor Alaihis Salatu wat Tasleem ki tashreef-aawari se pehle hi mubashshiraat ban kar aalam-e-kainaat ko khushkhabri dene lage.