Naat Lyrics

Hamesha Rehti Hai Woh Rehguzar Aankhon Mein – Hassanul Mustafa

By December 26, 2019No Comments

ہمیشہ رہتی ہے وہ رہگزار آنکھوں میں
کہ بھر کے لایا ہوں خاکِ دیار آنکھوں میں

میں تھوڑی دیر تو روضے کو دیکھ ہی نہ سکا
کہ آ گیا تھا دلِ بے قرار آنکھوں میں

ابھی بس اتنا کہا تھا “گناہگار ہوں میں”
گناہ دُھلنے لگے اشکبار آنکھوں میں

وہ التفات کے لمحے، وہ شفقتیں، وہ کرم
یہ دیکھ لو، ہے ابھی بھی خمار آنکھوں میں

میں آئینے میں اِنہیں دیکھتا ہوں، روتا ہوں
کہ عکسِ روضہ تھا اِن داغدار آنکھوں میں

درِ نبی ہے، یہاں سانس بھی ادب سے لے
پکارنا ہو اُنہیں تو پُکار آنکھوں میں

یہ زندگی مُجھے دے کر کہا گیا مُجھ سے
کہ جا! یہ ہجر کے لمحے گزار آنکھوں میں

تڑپ رکھو دلِ بےتاب میں زیارت کی
رکھو ہمیشہ فضا سازگار آنکھوں میں

وہ سامنے ہیں خدایا ! یہ خواب ٹُوٹے نہیں
تُو ایک لمحئہ دائم اُتار آنکھوں میں

یہ آنسئووں کی جھڑی بے سبب نہیں حسؔان
ٹھہر گیا ہے کوئی انتظار آنکھوں میں

(حسؔان المصطفیٰ – سیالکوٹ)