Durood-o-Salam ki sab se bari fazilat aur khusoosiyat yeh hai ke kasrat se Durood-o-Salam parhne wale ko khwab ya halat-e-baidari mein Huzoor Nabi Akram Sallallahu Alaihi Wa Aalihi Wasallam ki ziyarat naseeb hoti hai. Huzoor Nabi Akram Sallallahu Alaihi Wa Aalihi Wasallam ki ziyarat bohat bari sa'adat hai jo har ek ko maysar nahi aati balkeh khaal khaal hi kisi ko naseeb hoti hai.

Hazrat Ibn Abbas Radi Allahu Anhu se marwi hai ke Huzoor Nabi Akram Sallallahu Alaihi Wa Aalihi Wasallam ne farmaya:

"Jo momin Juma ki raat do rak'at is tarah parhe ke har rak'at mein 25 martaba 'Qul Huwallahu Ahad' Surah Fatiha ke baad parhe, phir hazar martaba yeh Durood parhe:

Allahumma Salli 'Ala Muhammadin-in-Nabiyyil Ummiyyi

To aane wale Juma se pehle khwab mein meri ziyarat kare ga, aur jo meri ziyarat kare ga Allah Ta'ala us ke gunah maaf farma de ga."

(Tabarani, Al-Mu'jam Al-Awsat, 6: 173, Raqam: 6111)