عِشق خیر الانام رکھتے ہیں
ایک کیف ِ دوام رکھتے ہیں
دِردِ لَب ان کا نام رکھتے ہیں
خود پہ دوزخ حرام رکھتے ہیں
کتنا محفوظ ہے سکوں اس کا
وہ جسے شاد کام رکھتے ہیں
اُن کے مستوں کا کیف کیا کہنا
مے کدہ ساز جام رکھتے ہیں
باد شاہوں کو جو نصیب نہیں
ہم نبی کے غُلام رکھتے ہیں
اسی گلی کے گدائے خاک نشیں
اِک نمایاں مقام رکھتے ہیں
ذِکرِ سرور کے فیض سے باقی
ہم بھی عالم میں نام رکھتے ہیں
جگمگاتے ہیں عاشقان ِ رسول
دل میں ماہِ تمام رکھتے ہیں
جو نبی کے غُلام ہیں خاؔلد
سارا عالم غُلام رکھتے ہیں