جو نسبت شہِ کون و مکاں پہ ہیں نازاں
وہ جانتے ہی نہیں کیا ہے گردشِ دوراں
نبی کے عشق نے چھوڑا نہ بے سرو ساماں
بڑا کرم ہے کہ خالی نہیں مراد اماں
وہ آنکھ محرمِ حق ہے جو آپ کو دیکھے
وہ دل ہے عرش کہ جس دل میں آپ ہیں مہماں
جس آستاں سے خدا تک رسائی ہوتی ہے
اس آستانے کی نسبت کا نام ہے ایماں
شمار کر نہیں سکتے اگر شمار کریں
قدم قدم پہ ہیں اتنے حضور کے احساں
کلام ِ پاک ہے آئینۂِ جمال ِ نبی
مرے حضور کی سیرت ہے سر بسر قرآں
کچھ اور چاند ستاروں کو روشنی مل جائے
جو بے نقاب مدینے کا ہو مہ تاباں
بیادِ رحمتِ کونین میں سلامت ہوں
وگرنہ گھیرے ہوئے ہیں ہزارہا طوفان
دُرود ان پہ سلام ان پہ رات دن خاؔلد
کہ جن کے نام سے زندہ ہے عظمت ِ انساں