اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

ہر عہد ہر مقام کے سلطان آپﷺ ہیں

خوشبو ہے جس کا جسم وہ انسان آپﷺ ہیں

ہر معتبر کتاب ہے منسوب آپﷺ سے

ہر معتبر کتاب کا عنوان آپﷺ ہیں

وہ پیکر جمیل ہے پہچان آپﷺ کی

اُس پیکر جمیل کی پہچان آپﷺ ہیں

دم توڑ دے اگر ہو جُدا آپﷺ سے زمیں

سب سے بڑے زمین کے مہمان آپﷺ ہیں

چُپ ہوں تو جیسے کعبہ کھڑا ہو نماز میں

بولیں تو حَرف حرف ہی قرآن آپﷺ ہیں

دیکھا نہیں کسی نے جسے آپﷺ کے سوا

اس لازوال حُسن کی برہان آپﷺ ہیں

رکھ کر میں صبح و شام دُعاؤں کی رحل پر

پڑھتا ہوں جس کو روز وہ قرآن آپﷺ ہیں

انجم پہ رحمتوں کی نوازش ہو بار بار

اُس کے لیے تو سُورۂ رحمان آپﷺ ہیں