نور کی بدلیاں چھا گئیں چار سو رب کی رحمت بر سنے لگی کو بہ کو چشم و دل نے کیے آنسؤوں سے وضو قدسیوں کی زباں پر چھڑی گفتگو جن کی ہر دل میں صدیوں سے تھی آرزو جن کی خوشبو سے ہوگا جہاں مشک بو وہ حسیں, دل نشیں, خوب رو, ماہ رو مصطفیٰ آ گئے, مصطفیٰ آ گئے
وجہِ تخلیق و فخرِ زمین و زماں شاہِ کون و مکاں, واقفِ این و آں فخزِ جن و بشر, شانِ پیغمبراں نکہت و رنگ و زیبائشِ گلستاں ناصر و رحم دل, مشفق و مہرباں غم زَدوں کے معیں, حامیِ بے کساں صاف الفاظ میں حاصلِ دو جہاں مصطفیٰ آگئے, مصطفیٰ آ گئے
آنکھ والوں نے دیکھا نہ جن سا حسیں حسن کی بھیک لیں جن سے زہرہ جبیں جن پہ قربان ہیں آسمان و زمیں خلق میں جن کا کوئی بھی ثانی نہیں جان و ایمان و روح و دلِ مومنیں راز دارِ خُدا, لا مکاں کے مکیں خاتم الانبیا, سید المر سلیں مصطفیٰ آ گئے, مصطفیٰ آ گئے
دین و ایمان کا پاسباں مل گیا عشق و عرفان کا گلستاں مل گیا رازِ کونین کا راز داں مل گیا غم کے ماروں کو اک مہرباں مل گیا بے ٹھکانوں کو بھی آشیاں مل گیا سنگ ریزوں کو طرزِ بیاں مل گیا ہم غلاموں کو سارا جہاں مل گیا مصطفیٰ آ گئے, مصطفیٰ آ گئے
غلام جیلانی سحر