اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

بہار باغ جنت ہے بہار روضۂ صابر

جوار عرش اعلیٰ ہے جوار روضۂ صابر

یہاں بے پردہ اللہ و نبی کی دید ہوتی ہے

ہمیں مکہ مدینے ہے دیار روضۂ صابر

زمیں کلیئر کی روضہ کی فضا پر ناز کرتی ہے

فلک ہوتا ہے پھر پھر کر نثار روضۂ صابر

یہاں پر مردہ دل آکر حیات تازہ پاتا ہے

بہار جاوداں ہے ہمکنار روضۂ صابر

رہے رنگیں چمن خون شہیدان محبت سے

سدا پھولے پھلے یہ لالہ زار روضۂ صابر

بناؤں غازہ رخسار ایماں خاک کلیئر کی

مری آنکھوں کا سرمہ ہو غبار روضۂ صابر

تصور سے نظر میں کوندتی ہیں بجلیاں بیدمؔ

عجب پر نور ہیں نقش و نگار روضۂ صابر