اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

حریم حسن حق دربار محبوب الٰہی ہے

کہ دیدار‌ خدا دیدار محبوب الٰہی ہے

محبت طرۂ دستار محبوب الٰہی ہے

محبت غازۂ رخسار محبوب الٰہی ہے

محبت کرنے والا آپ ہی محبوب ہوجائے

محبی آئینہ بردار محبوب الٰہی ہے

دل مردہ یہاں ہوتا ہے زندہ روح‌ عرفاں سے

وہی اچھا ہے جو بیمار محبوب الٰہی ہے

غرور بادشاہی سرنگوں ہے ان کے قدموں میں

کہ سلطانی عالم کار محبوب الٰہی ہے

یہاں الفقر فخری کی حقیقت کار فرما ہے

امیری غاشیہ بردار محبوب الٰہی ہے

حقیقت میں مئے حب الٰہی کے وہ ساقی ہیں

ہر اک مست خدا مے خوار محبوب الٰہی ہے

ذہینؔ الحمدللہ خلوت دل جلوت دل میں

ہمیشہ گرمئ بازار محبوب الٰہی ہے