جب کہ پیدا شہ انس و جاں ہوگیا
جب کہ پیدا شہ انس و جاں ہوگیا
جبکہ پیدا شہِ انس و جاں ہو گیا
دور کعبہ سے لوثِ بُتاں ہو گیا
دل مکانِ شہ عرشیاں ہو گیا
لامکاں لامکاں لامکاں ہو گیا
سر فدائے رہِ جانِ جاں ہو گیا
امتحاں امتحاں امتحاں ہو گیا
اُن کے جلوہ کا جس دم بیاں ہو گیا
گلستاں مجمعِ بلبلاں ہو گیا
ہر ستارہ شبِ مولدِ مصطفیٰ
شمعداں شمعداں شمعداں ہو گیا
چرخِ گردوں ترے روضۂِ پاک کا
سائباں سائباں سائباں ہو گیا
جس کو اُس کے مکاں کا پتہ مل گیا
بے نشاں بے نشاں بے نشاں ہو گیا
تھا بُراقِ نبی یا کہ نورِ نظر
یہ گیا وہ گیا وہ نہاں ہو گیا
حق شفاعت سے تیری گنہگاروں پر
مہرباں مہرباں مہرباں ہو گیا
گلشنِ طیبہ میں طائرِ سدرہ کا
آشیاں آشیاں آشیاں ہو گیا
یا نبی لو خبر آتشِ غم سے میں
تُفتہ جاں تُفتہ جاں تُفتہ جاں ہو گیا
گزرے جس کوچہ سے شاہِ گردوں جناب
آسماں آسماں آسماں ہو گیا
عشقِ ابرو میں میں رمزِ قوسین کا
نکتہ داں نکتہ داں نکتہ داں ہو گیا
کس کے روئے منور کی یاد آگئی
دل تپاں دل تپاں دل تپاں ہو گیا
طوطئِ سدرہ مدحِ رخِ پاک میں
گل فشاں گل فشاں گل فشاں ہو گیا
طوطیِ اصفہاں سُن کلامِ رضا
بے زباں بے زباں بے زباں ہو گیا