اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

شبِ غم بھی آخر بسر ہوگئی

تڑپتے تڑپتے سحر ہوگئی

مرے دَردِ دِل کی خبر ہوگئی

جو چشمِ کرامت ادھر ہوگئی

مَدینہ کا دیدار مشکل نہیں

نگاہِ عنایت اگر ہوگئی

دیارِ نبی میں گزر ہوگئی

یہ تقدیر کس اَوج پر ہوگئی

لیے قلبِ مضطر مَدینہ میں پہنچا

تسلی زمیں چوم کر ہوگئی

نگاہیں فدا روضۂ پاک پر

جبیں عاشقِ سنگِ در ہوگئی

مواجہ میں عرضِ صلوۃ و سلام

مری آبرو اس قدر ہوگئی

مَیَسَّر ہوا بوسۂ سنگِ در

یہ عزت تری نامہ بر ہوگئی

غموں میں مرے اِک اضافہ ہوا

دوا دَرد کی دردِ سر ہوگئی

غمِ عشق تھا دل کے اندر نہاں

مری پردہ در چشمِ تر ہوگئی

نعیمِؔ خطا کار پر یہ کرم

شفاعت نبی کی سپر ہوگئی

شبِ غم بھی آخر بسر ہوگئی