اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

محمد پہ صدقے زباں ہو رہی ہے

مُحمَّد پہ صدقے زباں ہو رہی ہے

انھیں کی یہ بس مدح خواں ہو رہی ہے

مجھے کیا بُلاتا ہے کوئی مدینے

مرے دل میں گویا اذاں ہو رہی ہے

صبا آرہی ہے مدینے سے ہو کر

کہ قسمت مری مہرباں ہو رہی ہے

چلو دیدِ طیبہ سے تسکین پائیں

وہاں کی زمیں آسماں ہو رہی ہے

مری آنکھ سے اشک جاری ہیں پیہم

مرے دل کی حالت عیاں ہو رہی ہے

نہ نالے ہیں لب پر نہ آہیں نہ شیون

زباں آج کل بے زباں ہو رہی ہے

مجھے اس کا بہزاؔد رونا ہے ہر دم

مری زندگی رائیگاں ہو رہی ہے