اَلصَّلٰوۃُ وَالسَّلاَمُ عَلَیْکَ یَا رَسُوْلَ اللّٰہ وَعَلٰی اٰلِکَ وَ اَصْحٰبِکَ یَا حَبِیْبَ اللّٰہ

کونین میں وُہ شمع جلائی حضورﷺ نے

پُر نُور کر دی سَاری خدائی حضورﷺ نے

پیغمبروں کے دِل میں رہی جِس کی آرزُو

دولت وہ ہم کو حق سے دلائی حضورﷺ نے

اہلِ خِرد کی آنکھ بڑی دُور تک گئی

سُوئے قمر جو اُنگلی اٹھائی حضورﷺ نے

اس پر نثار ہو گئیں خالق کی رحمتیں

محشر میں جِس سے آنکھ ملائی حضورﷺ نے

آزردہ پھِر رہے تھے ہم اس کائنات میں

ہم بیکسوں کی بات بنائی حضورﷺ نے

اعظم وہ دو جہاں کی حقیقت کو پا گیا

جِس کو بھی ایک گھونٹ پلائی حضورﷺ نے