اللہ رے تیرے در و دیوار مدینہ سرتا بقدم سب ہیں پُر انوار مدینہ
اے جلوہ گہہ احمد مختار مدینہ اللہ کے دلدار کے دل دار مدینہ
دنیا میں ہے تو رحمت باری کا وسیلہ ہردم یہ سمجھتے ہیں گنہہ گار مدینہ
ذرے ہیں تیرے چرخ کے تابندہ ستارے فردوس بھی ہے تیری طلب گار مدینہ
طیبہ سے ہم آئے ہیں یہی آرزو لے کر اللہ دکھا دے تو پھر اک بار مدینہ
سینے پہ ترے نقشِ کفِ پائے نبیﷺ ہے گودوں میں صداقت کے ہیں ابحار مدینہ
شمشیر شجاعت ہے کہیں جوئے سخاوت شیدا ہے تیرا حیدر کرّار مدینہ
فردوس کا منظر نظر آئے اسے پھیکا اک بارجو دیکھے ترا گلزار مدینہ
آغوش محبت میں طلبگارِ سکوں ہے مداح تیرا اخؔتر ناچار مدینہ