Skip to main content
نعت

کون ایسا ہے جسے خیرِ وَریٰ نے نہ دیا

By September 6, 2021No Comments

کون ایسا ہے جسے خیرِ وَریٰ نے نہ دیا
کوئی ایسا بھی ہے کیا جس کو خدا نے نہ دیا

آپ کے دین کا منکر ہے نرا، ناشکرا
کوئی کافر ہی کہے گا کہ خدا نے نہ دیا

جس کو تم نے دیا اللہ نے اس کو بخشا
جس کو تم نے نہ دیا اس کو خدا نے نہ دیا

آپ کے رب نے دیا آپ کو فضل کلی
وہ دیا تم کو جو اوروں کو خدا نے نہ دیا

وہ فضائل تمہیں بخشے ہیں خدا نے جن کا
آپ کے غیر میں امکان بھی آنے نہ دیا

مثل ممکن ہی نہیں ہے ترا اے لاثانی
وہم نے بھی تو ترا مثل سمانے نہ دیا

آپ کے جوڑ کا آئے تو کہاں سے آئے
جب و جود اس کو شہ ارض و سمانے نہ دیا

آدم و نوح، ابراہیم، کلیم و عیسیٰ
ان کو سب کو ملا کیا رب علا نے نہ دیا

باوجود اس کے تمہیں جو ملا ان کو نہ ملا
آپ کا رتبہ کسی کو بھی خدا نے نہ دیا

سب مطالب مرے بر آئے کرم سے ان کے
کوئی مطلب بھی مرے دل کا برانے نہ دیا

کیسی پر نور ہے جنت کی فضا اے نورؔی
پھر بھی طیبہ کا مزا اس کی فضا نے نہ دیا

سامانِ بخشش