Skip to main content
نعت

کتنی حسیں ہے اُن کے ثناخواں کی گفتگو

By August 23, 2021No Comments

کتنی حسیں ہے اُن کے ثناخواں کی گفتگو
آٹھوں پہر ہے سرورِ دوراں کی گفتگو


ہر وقت کیجئے شہِ خوباں کی گفتگو
آنکھوں کا ذکر ہو کبھی مثرگاں کی گفتگو


اَسریٰ میں جب حضورﷺ تھے خالق سے ہمکلام
تھی قُدسیوں میں عظمتِ انساں کی گفتگو


اللہ اور سلسلۂ شب دراز تو ہو
جاری ہے اُن کے گیسوئے ذیشاں کی گفتگو


سُن لے جو تذکرہ بھی عذارِ حبیبﷺ کا
چھیڑے نہ عندلیب گلستاں کی گفتگو


کیا شامِ عیدِ آمدِ یادِ حبیبﷺ ہے
ہے آنسوؤں میں جشنِ چراغاں کی گفتگو


تیرے سوا خیالِ نبیﷺ! میں تِرے نثار
سمجھا نہ کوئی دیدۂ گریاں کی گفتگو


دردِ فراقِ طیبہ ہے خود میرا چارہ گر
کیجے نہ میرے سامنے درماں کی گفتگو


پھولوں کی بزم ہو کہ ہو تاروں کی انجمن
ہوتی ہے آپ کے لب و دنداں کی گفتگو


کل روزِ حشر مدحِ نبیﷺ کے طفیل میں
اختؔر سے ہوگی حضرتِ حسّاں کی گفتگو

Was this article helpful?
YesNo