Skip to main content
نعت

شہنشاہِ دو عالم کا کرم ہے

By September 8, 2021No Comments

شہنشاہِ دو عالم کا کرم ہے

مرے دل کو میسر اُن کا غم ہے

یہیں رہتے ہیں وہ جانِ بہاراں

یہ دنیا دل کی رشک صد ارم ہے

بھلا دعوے ہیں ان سے ہمسری کے

سر عرشِ بریں جن کا قدم ہے

یہ دربارِ نبی ہے جس کے آگے

نہ جانے عرشِ اعظم کب سے خم ہے

ترس کھائو میری تشنہ لبی پر

مری پیاس اور اک جام؟ کم ہے

دلِ بیتاب کو بہلائوں کیسے

بڑھے گی اور بے تابی ستم ہے

یہاں قابو میں رکھیے دل کو اخترؔ

یہ دربار شہنشاہِ امم ہے