Skip to main content
نعت

جاکے لا اے عشق بے پایاں قلمدانِ حبیبﷺ

By August 20, 2021No Comments

جاکے لا اے عشق بے پایاں قلمدانِ حبیبﷺ
کچھ مضامین نعت کے لکھ زیر عنوان حبیبﷺ


کس کی آنکھیں لاکے دیکھوں بام عرفانِ حبیبﷺ
کون ہے جز کبریا کے مرتبہ دانِ حبیبﷺ


ہائے ہم ناشُستہ رو اور چشم گریانِ حبیبﷺ
سر اٹھانے ہی نہیں دیتا ہے احسانِ حبیبﷺ


گلشن فردوس پا کر مست بوہیں بلبلیں
اور ابھی دیکھا نہیں ہے نخل بستانِ حبیبﷺ


خاکِ پائے مصطفیٰﷺ پر لوٹتی ہیں جنتیں
سینکڑوں گلشن کھلے ہیں زیرِ دامانِ حبیبﷺ


رہ گزارِ مصطفیٰﷺ کی یاد فرمائی قسم
اس قدر بھائی مرے اللہ کو جانِ حبیبﷺ


سامنے کھولے ہوئے دو صفحۂ رخسار ہیں
یوں تلاوت کر رہا ہے رُوئے قرآنِ حبیبﷺ


گور کی تاریکیاں ہیں اور سیاہ فردِ عمل
المدد اے جلوۂ شمع شبستانِ حبیبﷺ


خوبئ قسمت پہ جتنا ناز ہو کم ہے خلیؔل
رحمتِ حق نے بنایا ہے ثنا خوانِ حبیبﷺ

Was this article helpful?
YesNo