Skip to main content
نعت

جو ہیں حبیبِ خالقﷺ بر تر وہﷺ آگئے

By August 23, 2021No Comments

جو ہیں حبیبِ خالقﷺ بر تر وہﷺ آگئے
جشنِ سرور و نور ہے گھر گھر وہﷺ آگئے


لب تشنہ! دیکھ ساقئ کوثر وہﷺ آگئے
رحمت کا بادہ خانہ بہ ساغر وہﷺ آگئے


نغمہ ہے بلبلوں کی زباں پر وہﷺ آگئے
بولی کلی گلوں سے چٹک کر وہﷺ آگئے


وقفِ پیامِ عید چمن میں صبا ھے آج
جو ہیں بہارِ حسنِ گُلِ تَر وہﷺ آگئے


دیتی ہے شاخ، شاخ کو پیغامِ تہنیت
کہتا ہے پھول، پھول سے ہنس کر وہﷺ آگئے


بھرتے ہیں رات دن جو فقیروں کی جھولیاں
کرتے ہیں جو گدا کو تونگر وہﷺ آگئے


قسمت پہ اپنی آج ہیں نازاں گناہگار
کہتے ہیں جن کو شافعِ محشر وہﷺ آگئے


جانِ حزیں کا چَین، سکونِ شکستہ دِل
جو ہیں قرارِ خاطرِ مضطر وہﷺ آگئے


روشن ہے جن کے نام سے اسلام کا چراغ
جو حق کے نازنین ہیں اختؔر وہﷺ آگئے

Was this article helpful?
YesNo