Skip to main content
نعت

جوت سے ان کی جگ اجیالا

By September 8, 2021No Comments

منظوم تفسیر

جوت سے ان کی جگ اجیالا
وہ سورج اور سارے تارے

اِنَّا اَعْطَیْنٰکَ الْکَوْثَرْ
تم رب کے ہم سب ہیں تمہارے

یُعْطِیْ ربک حتیٰ تَرْضیٰ
مر ضئ رب ہیں تمہارے اشارے

کلمہ و خطبہ نماز و اذاں میں
بولتے ہیں سب بول تمہارے

اہلِ زمیں کے نصیبے چمکے
جب وہ فرش سے عرش سد ہارے

ہم نے ناؤ بھنور میں ڈالی
تم  اس ناؤ کے کھیون ہارے

ہم  نے ہمیشہ کام بگاڑے
تم نے بگڑے کام سنوارے

آقا حشر میں عزت رکھنا
عیب نہ یہ کھل جائیں ہمارے

ہم کو نہ دیکھو آپ کو دیکھو
گو بَد ہیں کس کے ہیں؟ تمہارے!

در کے کمین ہیں غیر نہیں ہیں
پھرتے پھریں کیوں مارے مارے

تھوڑی زمین جو  مدینہ میں دے دو
آن پڑیں قدموں میں تمہارے

نزع میں قبر میں اس سالکؔ کو
چاند سی شکل دکھانا پیارے

Leave a Reply