Skip to main content
نعت

اللہ اللہ انتہائے احترامِ مصطفیٰﷺ

By August 21, 2021No Comments

اللہ اللہ انتہائے احترامِ مصطفیٰﷺ
خاص قربِ حق تعالیٰ ہے مقامِ مصطفیٰﷺ


لے رہا ہے بھیک رب سے ہر غلامِ مصطفیٰﷺ
بٹتی ہے رحمت سرِ محشر بنام مصطفیٰﷺ


بادۂ جَاؤُکْ پی کر تشنہ کامِ مصطفیٰﷺ
بےخودی میں جھومتے ہیں لے کے نامِ مصطفیٰﷺ


ہے ضیائے مطلعِ والفجر صبحِ تابناک
نورِ سبحٰن الَّذِی اَسْریٰ ہے شامِ مصطفیٰﷺ


دیکھ کر رنگینئ حُسن و جمالِ کائنات
آگیا بے ساختہ ہونٹوں پہ نامِ مصطفیٰﷺ


ان مُکَیَّفْ مست کوثر پاش آنکھوں کے نثار
ہے شرابِ مَنْ رَانیِ زیبِ جامِ مصطفیٰﷺ


صبح کی آغوش میں لیتی ہے شب انگڑائیاں
یا ہے خم عارض پہ زلفِ مشکفامِ مصطفیٰﷺ


نامِ اقدس کلکِ قدرت نے لکھا ہر چیز پر
یعنی ہے کونین کی ہر شَے بنامِ مصطفیٰﷺ


کیوں نہ اختؔر دو جہاں میں میرا بیڑا پار ہو
میں سگِ حامد رضا خاں، ہوں غلامِ مصطفیٰﷺ

Was this article helpful?
YesNo